Cangas del Narcea crea'l Conseyu Asesor de la Ḷḷingua

Cangas vien d’aprobar la creación del Conseyu Asesor de la Ḷḷingua, “pa facilitar la participación ciudadana en relación conos ámbitos d’actividá pública relacionaos cona ḷḷingua”.

El Conseyu Asesor va elaborar y facer un siguimientu de les polítiques de normalización, va proponer acciones y evaluar los planes de normalización, elaborar proyeutos con otres instituciones, canalizar la participación ciudadana, informar al Conceyu de les iniciatives desendolcaes y promover midíes, suxerencies, propuestes o quexes pal so alderique.

Esta entidá va tar conformada pola persona que dirixe la Conceyalía de Cultura y Deportes del Conceyu Cangas, un representante por cada grupu políticu integrante na Comisión Informativa del Conceyu de Cultura ya Deportes, un representante de cauna de las asociaciones rellacionaes cola lligua en Cangas, un representante de l’ALLA, RIDEA y Universidá d’Uviéu que tengan vinculación col Conceyu, una persona que represente a l’Asociación d’Escritores n’Asturianu y, pa finar, el personal técnicu del serviciu de normalización de Cangas. La presidente del Conseyu va ser la Conceyala d’Educación y Cultura, Bibiana Martínez, por delegación del Alcalde.

El conteníu del alcuerdu adoptáu va publicase nel Tablón d’Edictos de la Corporación y nel Boletín Oficial del Principáu d’Asturies nun plazu de quince díes naturales a los efeutos d’alegaciones, suxerencies y/o reclamaciones, quedando definitivamente aprobáu en casu de nun producise nengún pidimientu.