Convoquen una concentración contra la incineradora

El Conceyu escontra la Incineración y la Plataforma de Ganaderos y Afeutaos pola Incineradora convoquen pal 6 de xunu, una concentración contra “esta peligrosa instalación”.

La concentración va facese na Plaza del Náuticu de Xixón a les 12:30 hores y va cuntar con una simbólica degustación de ‘lleche ensin dioxines’, “lo que quiciabes nun se puea facer si entra en funcionamientu la peligrosa incineradora”.  

Pa los convocantes, la incineración de borrafes anicia nuevos problemes ambientales y sanitarios, desincentiva la minimización de la xeneración de borrafes, y ye incompatible con programes de recuperación, reciclaxe y compostaxe, que valoricen los materiales refugaos pola población.

Amás, indiquen que la incineración tamién supon un grave atentáu pa la salú de tola zona central asturiana cuando la calidá del aire ye de les peores del Estáu. “Tenemos el nivel mas alto de morbilidá ambiental d'España, encabezamos el ranking d'enfermos de cáncer y amás quieren metenos una maquina de contaminar”, apunten.

Del mesmu mou, afirmen que la incineración de la basura produz la emisión de gases cargaos con múltiples contaminantes, canceríxenos y alteradores hormonales “cuando nun radiu de 15 km vivimos 800.000 asturianos y hai 500 esplotaciones ganaderes, toos ellos tamos amenaciaos por esta instalación, polo que vamos siguir trabayando en tolos frentes”.