Ribeseya; cuestionáu por filólogos y participantes nel trabayu de campu

El topónimu 'Ribeseya' ye yá oficial, pero dellos filólogos y espertos en toponimia que participaron nel trabayu de campu cuestionen la forma, y defenden la so variante con 'll'.

Asina los señalaron Fernando Álvarez Balbuena, Ramón d'Andrés y Ramón Sordo Sotres, que tien dellos estudios publicaos sobre toponimia n'Asturies.

Balbuena, profesor de Filoloxía, coordinó los estudios de campu realizaos nel llugar. A la hora d'aprobase la propuesta emitió un votu particular porque, según les sos palabres en declaraciones a Europa Press, "yera una irregularidá, y hasta yera illegal", pues "va en contra de la propia llei de promoción del asturianu, que diz que tienen qu'aprobase los tradicionales".
  
Asina, recordó que se ficieron cinco trabayos de campu y en toos "quedó clarísimo que, habiendo varies formes (Ribesella, Ribasella, Ribaesella), toes yeren con 'll'", siempre atendiendo a los falantes que diferencien ambes pronunciaciones, la 'y' y la 'll'. Afirmó que se "constató fidedignamente". Señaló que la mayor parte de los falantes consultaos "distiguen mui bien" los dos soníos.
  
N'opinión de Balbuena, apostóse polo "que tenía que ser, pero la llingüística nun son matemátiques. Nun podemos dicir lo que tien que ser si los falantes dicen otra cosa".
  
Al final la decisión tomóla'l Conceyu de Ribesella en plenu, "poniendo Ribadesella primero con una barra", porque "si nun se llega a poner Ribadesella, eso nun s'aprueba na vida".  "Pa muncha xente", criticó, "manteniendo'l que yera l'oficial hasta agora, no que venga a la derecha de la barra, como si pones Villaviciosa de Odón".
  
Ramón d'Andrés, filólogu tamién de la Universidá d'Uviéu, recordó que s'opunxo a la forma con 'y' "porque Ribeseya nun ye una forma constatada. Nun s'usa. Ye una forma inventada que nun ta recoyida nin atestiguada na fala popular de la xente que fala asturianu nel Conceyu". "Básase", esplicó "en ciertes suposiciones, según les cuales, Ribeseya ye lo que tendría que decise. El razonamientu ye bien intencionáu, según la evolución de la palabra, pero resulta que nun ye asina", añadió.
  
A lo último, Ramón Sordo Sotres remitióse a los sos estudios, que recueyen tamién les tres formes (Ribesella, Ribasella y Ribaesella), pero "toes con 'll'", sin entrar a facer más declaraciones al respeuto.