Una asociación de xuristes denuncia a Álvarez Cascos por calumnies

L'asociación Preeminencia el Derecho presentó ante'l Xulgáu de Guardia de Madrid una denuncia contra Francisco Álvarez Cascos por un presuntu delitu de calumnies.

L'ex secretariu xeneral del PP cometería esti delitu, afirmen, al calificar de "camarilla de la policía xudicial" a los funcionarios de la Comisaría Xeneral de Policía pola so actuación mientres la investigación de la trama de corrupción 'Gürtel'.
  
La denuncia inclúi una reseña periodística na que se da cuenta del intentu de la mesma Policía d'actuar contra Álvarez Cascos y añade que les palabres qu'ésti dirixó'l pasáu 4 d'abril a los funcionarios de la unidá de blanquéu y delincuencia económica pol so trabayu na operación 'Gürtel' puen ser constitutivos de delitu porque'l mandatariu "atribuyó-yos un actu de falsificación de documentos". "Fechu mui grave que, de nun ser ciertu y resultar probáu, ye calumnia", añade l'escritu.
  
En concreto, Álvarez Cascos señaló mientres una entrevista radiofónica que "hai una camarilla de la policía xudicial, instalada en Canillas, dedicada a preconstituir pruebes". "Nel mio casu -añadió-, claramente dedicada a preconstituir una prueba falsa. D'eso doi testimoniu en primer persona. Y como eso hai más. Y pue haber muncho más".
  
La denuncia añade que les declaraciones, al tar referíes a funcionarios públicos, son perseguibles d'oficiu, a diferencia de cuando se dirixen contra particulares, en que son los agraviaos los únicos lexitimaos pa denunciar.

Ante la fiscalía
  
Per otru llau, Preeminencia del Derecho, que preside'l lletráu murcianu José Luis Mazón, pidió a la Fiscalía Xeneral del Estáu qu'abra una investigación sobre los fiscales de Madrid que, según una información periodística, negáronse a poner querella contra Álvarez Cascos, en recibiendo una comunicación de los policíes afeutaos, "puesto que la denuncia de los delitos polos fiscales nun ta sometida al principiu d'oportunidá o voluntarismu sinón que resulta reglada y habiendo nicios de delitu han proceder".