La supresión d'autovíes aforraría 8.423 millones a Fomentu

|

Según grupos ecoloxistes, la supresión d'autovíes con poco tráficu y altu impactu aforraría 8.423 millones a Fomentu. L’exe Ponferrada-La Espina ta ente les que citen.

Amigos de la Tierra, Ecoloxistes n'Acción, Greenpeace, WWF y SEO/BirdLife enviaron al Ministeriu de Fomentu una llista de proyectos que, al so xuiciu, tendríen de refugase "pola so falta de viabilidá económica, poca demanda y eleváu impactu ambiental" lo que supondría un aforru de 8.423 millones d'euros, según los ecoloxistes.
 
Les asociaciones afirmen nun comunicáu conxuntu que la mayor parte de les obres proyeutaes nel Plan Estratéxicu d'Infraestructures y Tresporte (PEIT) "nin siquiera s'averen la densidá de tráficu mínima necesaria -10.000 vehículu/día- pa plantegar un desdoblamientu". Amás, denuncien que Fomentu prevé executar munchos d'estos proyeutos en zones d'altu patrimoniu natural d'España.
 
En concretu, faen alusión a l'autovía A-43, al tramu que quier construyise ente Miajadas, Mérida y Puertollano, lo qu'afeutaría a especies como l'águila imperial ibérica, el buitre negru, la cigüeña negra, la águila-azor perdicera y el llobu cerval ibéricu; l'autovía A-83 (Zafra-Huelva) y la vía rápida N-433, que pondríen en "riesgu" la zona de Sierra Morica (Huelva); y l'autovía A-81 pa enllazar Badaḥoz, Córdoba y Granada, una infraestructura que traviesa y fragmenta'l corredor natural de Sierra Morica, onde se reintroduxeron exemplares de llobu cerval ibéricu.
  
Amás, el tramu Ávila-Maqueda de l'autovía A-40 va afectar a doce espacios de la rede Natura 2000; el tramu Cuenca-Teruel de l'autovía A-40 traviesa una zona na qu'habiten la águila real y el frangüesu; l'AP-41, nel so percorríu per Toledo-Ciudad Real y Ciudad Real-Córdoba, onde habiten especies como'l llobu cerval, l'águila imperial, el buitre negru o la cigüeña negra; y l'autopista AP-69 Dos mares que cruZa una zona d'altu valor ambiental con 25 espacios protexíos.
  
A lo último, señalen los casos de l'autovía Cáceres-Badaḥoz, na Sierra de San Pedro, onde viven rapaces como l'águila imperial o'l buitre negru; y l'exe Espina-Ponferrada, que va repercutir nes poblaciones d'osu pardu y gallu montés cantábricu qu'hai nes zones esistentes ente Asturies y Castiella y Lleón.

Contador Estadistiques