De la Vega refuga antemanar les eleiciones xenerales

Fernández de la Vega refugó que vaya haber una convocatoria antemanada d'eleiciones, al asegurar que los ciudadanos diéron-yos la confianza pa cuatro años y tovía nun acabaron.

La vicepresidenta primera del Gobiernu tamién refugó la posibilidá de plantegar una cuestión de confianza. Nesti sen, De la Vega afirmó que'l proyetu que promueve'l presidente del Gobiernu, José Luis Rodríguez Zapatero, "ta más vivu y vixente que nunca" y que tien "la lexitimidá" que-y dieron los ciudadanos nes urnes pa cuatro años.
  
De la Vega realizó estes afirmaciones un día depués de que l'Executivu llograre aprobar por un solu votu de diferencia'l decretu llei de recorte del gastu. Según precisó: "ésti nun ye tiempu de pensar en clave eleutoral, sinón d'asumir responsabilidaes", non yá per parte del que gobierna, sinón "caún la que-y correspuende".
  
"Dalgo ta bien claro, la eleutoral nun ye la guerra qu'agora llibra España, en concencia nun ye la que llibra'l Gobiernu, que ta lluchando contra la crisis. Esi ye'l nuesu deber y tamos cumpliéndolu anque de vez en cuando les midíes seyan tan dolioses como les d'ayeri, anque conlleve pidir sacrificios a ciudadanos", declaró na rueda prensa posterior al Conseyu de Ministros.
  
La vicepresidenta, que realizó una declaración inicial nesti sen, tuvo que responder a delles entrugues de los periodistes sobre la posibilidá de qu'haya un adelantu eleutoral. Pero en tolos casos calcó en que sería "una irresponsabilidá" pensar agora nesta cuestión y recordó que los ciudadanos otorgaron la so confianza "pa gobernar mientres cuatro años". "Éstos tovía nun remataron", esclamó. Poro, afirmó: "vamos siguir gobernando, tomando decisiones con firmeza y fortaleza, hasta que recuperemos la senda'l crecimientu económicu y l'empléu".
  
Na mesma llinia, esplicó que lo que'l Gobiernu fixo ye "priorizar" les "midíes escepcionales" que se revelaron necesaries frente a un programa y un discursu d'investidura "avaláu pol Parllamentu nuna situación de normalidá".
 
Almitió, sicasí, que l'Executivu ta faciendo "lo que-y toca facer" y non lo que-y presta facer. Pero xustificólu alegando "responsabilidá colos ciudadanos y col país". "Por eso quiero dicir que'l proyectu que representa y promueve Zapatero ta más vivu y vixente que nunca", sentenció.
  
La vicepresidenta tamién refugó la posibilidá de que se presente una moción de confianza. "Yá-y digo d'entrada que non", espetó y calcó: "equí ta diciéndose que nun precisamos una moción de confianza".