Aragón entama la designación del Conseyu Superior de Llingües

Les Cortes d'Aragón abrieron el procesu de designación de los cinco representantes nel Conseyu Superior de Llingües, que va crear les Academies del Aragonés y el Catalán.

Los cinco Grupos Parllamentarios disponen hasta'l próximu 9 de xunu pa presentar a los sos candidatos. El procesu d'eleición va mandase pol procedimientu habitual de nomamientos de les Cortes d'Aragón.
 
El Conseyu Superior de les Llingües d'Aragón concebióse como un órganu consultivu, de carácter colexáu, d'especial importancia pal desarrollu de la política llingüística na Comunidá Autónoma. Ente les sos funciones, destaca l'adopción de les midíes adecuaes pa garantizar la protección del patrimoniu llingüísticu aragonés y el siguimientu de los planes y programes en materia llingüístico que se pongan en marcha.

Amás, va poder emitir informes por iniciativa propia o a solicitú de l'Alministración n'asuntos rellacionaos cola política llingüística y efectuar propuestes sobre actuaciones de fomentu y garantía del usu, enseñanza y conocencia de les llingües y modalidaes llingüístiques.
  
Esti órganu tamién va poder emitir informes previos a la declaración de les zones y conceyos d'usu de les llingües propies y espresar la so opinión sobre l'establecimientu de los topónimos na Comunidá Autónoma d'Aragón.
  
Tal como recueye'l testu llegal, el Conseyu Superior de les Llingües d'Aragón va tar formáu por 15 miembros, que tendrán que designase ente filólogos, xuristes, sociólogos, destacaes personalidaes de les lletres, la enseñanza o la investigación llingüística o de los ámbitos social o cultural de la Comunidá aragonesa.
  
El so nomamientu cuerre a cargu del presidente d'Aragón, a propuesta de les Cortes d'Aragón, del Gobiernu d'Aragón y de la Universidá de Zaragoza, que van avalar en cada cada casu a cinco candidatos que van designase por un períodu de seis años y van renovase por terceres partes cada dos.