El fiscal avala'l procesamientu d'Otegi y Usabiaga

El fiscal pidió la confirmación del procesamientu a Otegi y otros siete dirixentes abertzales, al considerar que'l proyectu 'Bateragune', daba "cobertoria a les tesis d'ETA".

El fiscal de l'Audiencia Nacional Vicente González Mota defendió esti planteamientu mientres la vista a puerta zarrada que la Estaya Tercera de la Sala de lo Penal celebró güei p'analizar el recursu d'apelación contra'l so procesamientu que presentaron seis de los ocho imputaos nesta causa, na que s'investiga la creación de "un referente políticu" que sustituyere a Batasuna nes elecciones municipales y forales del 2011.

El representante del Ministeriu Públicu defendió que'l proyectu Bateragune (Toos xuntos, en vascu) "forma parte de la estratexa que yá declaró illegal l'Audiencia Nacional, la Sala Segunda y la Sala del 61 del Tribunal Supremu" y que consiste en "combinar l'actividá institucional coles pistoles y les bombes".
  
L'autu de procesamientu, que Garzón dictó'l pasáu 25 de xineru por un delitu d'integración n'organización terrorista, recurriéronlu les defenses d'Otegi, Díez Usabiaga, Arkaitz Rodríguez, Miren Zabaleta, Sonia Jacinto y José Luis Moreno, qu'alegaron que l'actividá que desarrollaben cuando los detuvieron tenía un carácter políticu y taba al marxe de les actividaes de la banda. Los otros dos procesaos nesta causa son Amaia Esnal y José Manuel Serra.
  
A toos ellos detúvoselos el pasáu 13 d'ochobre como resultáu d'una operación que se desarrolló na sede de LAB de San Sebastián. Garzón destacaba que los ocho pretendíen "crear un bloque pal desarrollu d'una estratexa soberanista" que diera forma a la estratexa "político-militar" d'ETA, creando un nuevu referente políticu institucional que sustituyere a Batasuna y que taba previsto constituyir na primavera del 2010.
  
Los únicos cuatro procesaos que siguen en prisión por esta causa son Otegi -treslladáu esti mes de mayu a la prisión de Logroño-, Arkaitz Rodríguez, Miren Zabaleta y Sonia Jacinto. Díez Usabiaga, ex secretariu xeneral de LAB, salió de la cárcel el pasáu 26 d'abril por orde de Garzón pa que pudiera cuidar a la so madre dependiente.