El parllamentu catalán pide al TC que se declare incompetente

El Parllamentu catalán unvió al Constitucional un escritu redactáu polos sos diez lletraos nel que pide que se declare incompetente pa dictar sentencia sobre l'Estatut.

Los lletraos entienden que la so situación actual "podría hasta llegar a calificase como irregular o viciada", puesto que s'incumplen los principios d'independencia y imparcialidá qu'han guiar la so actuación.
  
L'escritu, recoyíu por Europa Press, indica que la so solicitú d'incompetencia "nun ye una táctica dilatoria del procedimientu", y ve anómala l'actual composición del Tribunal, con cuatro miembros con mandatu prorrogáu dende'l 2007 y dos vacantes, una por fallecimientu y otra por recusación.
  
"Les condiciones qu'aseguren la independencia y imparcialidá del TC viéronse afectaes gravemente. La capacidá de xulgar oxetivamente resultó menospreciada", argumenta'l testu, que considera que l'Altu Tribunal tien qu'evitar cualquier sospecha na so actuación siendo escrupulosu al máximu.
  
La esistencia de 'bloques' -"lo cual paez confirmase cuando l'alliniación d'unos maxistraos con otros repítese davezu, seya cuala seya la cuestión sometida a la so considerancia"- nun ye lóxica, según la cámara, y podría inducir a pensar qu'esisten criterios extraxurídicos nestes actuaciones, algo que'l TC tien qu'evitar.
  
Tamién tendríen de ponese llendes a les filtraciones, una y bones les sos deliberaciones tienen de ser secretes, polo qu'el so espardimientu proxecta a la opinión pública la imaxe d'un Altu Tribunal "marcada pola politización, cola consiguiente pérdiga d'enfotu ciudadanu", añedir.
  
Seya que non, si'l TC declárase incompetente, el testu cree que l'órganu nun abdicaría de les sos responsabilidaes, sinón que reconocería que la situación actual nun dexa resolver los diversos recursos nes condiciones afeches.
  
L'escritu róblenlu los diez lletraos del Parlament, y unvióse tres una xunta estraordinaria de la Xunta de Voceres de la cámara antes d'empezar el plenu de güei, lo que permite cumplir l'acuerdu qu'algamaron tripartitu y CiU el 29 d'abril.
 
Vulneración "descarada"
  
Pal Parlament, la Constitución establez que los miembros del TC tienen de renovase de forma temporal, polo que la composición actual vulnera de forma "clara y flagrante" esti principiu constitucional y eso afecta a la so lexitimidá.
  
Por too ello, nel TC dase una perda de "les condiciones necesaries" pa garantizar que cumpla colos requisitos d'independencia y imparcialidá, y tamién s'enzanca la obligación que tienen los tribunales d'inspirar confianza. Amás, l'escritu considera que'l TC nun tien de pronunciase sobro lleis que se refrendaron, y si lo fai, produzse un claru sobrepasu de les sos funciones.
  
"La renovación del TC -un terciu de los sos miembros cada trés años- qu'establez l'artículu 159.3 de la Constitución ye una obligación", polo que la so situación actual incumple la llei, asegura'l Parlament, porque amás, el carácter temporal de los nomamientos dan lexitimidá al órganu.
  
Asina, la composición actual nun queda amparada pela Carta Magna, siendo una vulneración directa y frontal de la Constitución, "en cuanto desdibuxa gravemente'l modelu d'órganu diseñáu pola mesma".
  
"Cuando les caducidaes de mandatos son tan ostensibles y numberoses tendría de primar un principiu de prudencia institucional na toma de decisiones, y más cuando éstes afecten a una norma de la trescendencia del Estatutu d'Autonomía", añade'l documentu.