Touraine y Bauman, y Miyamoto, finalistes de Comunicación 2010

La candidatura conxunta d'Alain Touraine y Zygmunt Bauman y la del xaponés Shigeru Miyamoto, resultaron finalistes del Príncipe de Comunicación y Humanidaes.

Una fase a la que tamién llegaron l'escritor y periodista estaoxunidense Tom Wolf y el psiquiatra madrilanu Diego Gracia, informaron fontes cercanes a la Fundación. Asina lo decidió'l xuráu del galardón que se reunió güei nel Hotel de La Reconquista d'Uviéu y que tuvo presidíu por Manuel Olivencia. El fallu, el terceru d'esta trixésima edición, va facese públicu mañana al mediudía, una vez acaben les deliberaciones.
  
Alain Touraine ta consideráu ún de los más importantes sociólogos contemporáneos. Con títulos como 'Conocencia y Identidá' y 'El mundu de les muyeres', la so obra céntrase na relación ente l'individuu y la sociedá. Zygmunt Bauman ye profesor eméritu de Socioloxía na Universidá de Leeds y autor d'obres como 'Europa, una aventura inacabada', 'Vida de consumu' y 'Llibertá'.
  
Pela so parte, el xaponés Miyamoto ye direutor alministrativu xeneral de la Área d'Entretenimientu, Analís y Desarrollu de 'Nintendo', compañía de la que forma parte dende 1977, y máximu responsable del Área Recreativa y de Desarrollu de Productu y ta consideráu'l padre del videoxuegu modernu.
  
El xuráu ta integráu pola editora del diariu ABC, Catalina Luca de Tena; el vicepresidente de Vocento, Enrique Ybarra; el presidente de RTVE y de Tele 5, Alberto Oliart y Alejandro Echeverría, respectivamente, y los periodistes José Luis Gutiérrez, Miguel Ángel Liso y Diego Carcedo.
  
Tamién van formar parte del tribunal, el presidente de l'Axencia EFE, Álex Grijelmo, y el de la Televisión del Principáu d'Asturies, José Ramón Pérez Ornia, asina como la conseyera d'Alministraciones Públiques y vocera del Gobiernu asturianu, Ana Rosa Migoya.