Les Cortes alcuerden por unanimidá impulsar la llingua

Les Cortes de Castiella y Lleón alcordaron que la Junta cumpla col mandáu del Estatutu pa regular la so protección y usu. Amás, per primer vegada sintióse l’idioma en Valladolid.

PP y PSOE reconocieron que pautaron ayeri un alcuerdu, polo qu’a la fin hubo unanimidá pa sofitar una propuesta de resolución que fala d'impulsar el lleonés dientro del patrimoniu llingüísticu de la Comunidá y poner en marcha un plan de midíes pa la so proteición específica en coordinación coles demás alministraciones públiques competentes.

Les principales diferencies ente los dos grupos mayoritarios nes Cortes de Valladolid, vino por si la proteición tenía que recoyese pente medies d’un reglamentu –postura del PSOE- o non –como afirmaba’l PP-. A la fin, alcordaron llindar l’alcuerdu a encamentar a la Xunta a impulsar el lleonés con midíes de protección específiques y cumplir col artículu 5.2 Estatutu d'Autonomía, que con too diz que la proteición del lleonés tien que regulase.

L’encargáu de presentar la iniciativa, el socialista José Ignacio Martín Benitu, entamó la so intervención con unes estrofes del poeta José Benitu Mateos, escrites nos restos del lleonés que se falen al sur de Salamanca.

El socialista recordó la enseñanza del lleonés como materia extraescolar en 16 centros de la ciudá de Lleón, amás del encamientu del Procurador del Común, el defensor del pueblu autonómicu, pa la regulación del idioma. Poro, plantegó la necesidá d’un plan específicu y un reglamentu que recueya’l so usu y promoción.

Mientres, la popular Ana Rosa Sopeña refugó que la Junta nun sofitara'l lleonés. Asina, punxo como exemplu dellos actos y xornaes de promoción, dalgunos en collaboración del Institutu Castellán y Lleonés de la Llingua. La procuradora popular dixo qu’habría regulase’l lleonés previu informe del Institutu.

Mientres, el voceru del Grupu Mistu, Joaquín Otero, pidió a PP y PSOE que se punxeren d'alcuerdu nel desendolcu d'una norma que ta recoyida nel Estatutu d'Autonomía de Castiella y Lleón.