Los ecoloxistes piden ameyorar les llinies en cuenta del AVE

La Coordinadora Ecoloxista quier que nun se de prioridá al AVE y apuesten por ameyorar les llinies esistentes, “con trenes llanzadera que conecten Xixón y Uviéu col AVE en Ḷḷena.

“Ye un erru la prioridá otorgada al AVE, con un costu colosal no económico y ambiental, dexando de llau’l tráficu de cercaníes y el caltenimientu y el desenvolvimientu de les redes ferroviaries esistentes”, señalen los ecoloxistes, qu’afirmen qu’esta última opción ye pola que s’inclinen técnicos y espertos en trasporte.

Camienten que l’estudiu informativu ta “viciáu d'orixe ya incompletu onde yá se deduz que gran parte del trazáu yá ta decidíu ensin qu'haya nengún informe que lo avale”. Amás, indiquen que la memoria oculta a la opinión pública información básica determinante pa valorar la idoneidá del proyeutu, “nun se fala de la opción de la rexeneración, el caltenimientu y la optimización de les llínees esistentes, que ye la solución alternativa más aceptable dende un puntu de vista medioambiental, y a un costu económicu muncho menor que la construcción de llinies nueves”.

Tamién falen del impactu que va suponer sobre dellos espacios naturales protexíos a lo llargo del recorríu como la Reserva Natural Parcial de la Cueva de les Caldas o la Zona Especial de Protección de les Aves de los Banzaos del Centru.

Afirmen qu’hai que tener en cuenta la contaminación acústica y les vibraciones que se va xenerar por cuenta de la proximidá a les viviendes, “sorprende que na memoria namás falen d'esta contaminación acústica n'Uviéu y Xixón, como si'l restu d'habitantes fueren sordos”.

Señalen que la llinia va camudar les condiciones paisaxístiques de la redolada, amás de producir impactos sobre la calidá de les agües soterraño y superficial. Comenten tamién que ye precisu conocer l'impactu de les obres complementaries de les llinies d'alimentación “que na memoria nun se citen”.

“Son unes obres importantes con un costu ambiental y económico desproporcionáu pa consiguir poco serviciu y nula conectividá, poro solicitemos al Ministeriu la opción d'ameyorar l'actual rede, con trenes llanzadera que conecten les estaciones de Xixón y Uviéu cola llínea de l'Ave en Ḷḷena”, resalten pa finar.