Picos d'Europa ye'l segundu Parque más visitáu del Estáu

La viceconseyera de Mediu Ambiente dixo na xunta del Conseyu de la Rede de Parques Nacionales que' Picos d'Europa ye'l segundu más visitáu d'España, tres El Teide.

El Conseyu celebráu en Valsaín (Segovia) tuvo presidíu pola ministra de Mediu Ambiente y Mediu Rural y Marín, Elena Espinosa, a la qu'acompañaron el secretariu d'Estáu de Mediu Rural y Agua, Josep Puxeu, y el subsecretariu de Mediu Ambiente y Mediu Rural y Marín, Santiago Menéndez de L.luarca.

Mientres l'alcuentru, nel que se fixo un siguimientu de la Rede de Parques, la viceconseyera de Mediu Ambiente, Belén Fernández, xunto colos sos homólogos de Cantabria y Castiella-Lleón, aprovechó pa informar sobre l'acuerdu que les trés Comunidaes Autónomes algamaron la selmana pasada en Cuadonga col fin d'asumir la xestión del Parque Nacional del Picos d'Europa. Pela so parte, Espinosa felicitó a les Comunidaes Autónomes por "llegar a un acuerdu común tres un procesu de negociación difícil".
  
Fernández esplicó que'l pactu asitia'l trespasu "nun escenariu asumible en términos d'inversión pa les Comunidaes Autónomes", puesto que toma como referencia d'inversión la del añu 2009, que ye la más elevada que tuvo'l Parque Nacional y, nesti sen, afirmó que "mereció la pena esperar hasta agora porque dende l'añu 2006 hasta'l 2009, la inversión en Picos aumentó un millón d'euros".
 
Coles mesmes, recordó'l carácter integrador del acuerdu que va incorporar "con voz" nel órganu de xestión del Parque al Estáu y a una representación de los conceyos. Tamién calcó en que va permitir garantizar el so llugar de trabayu al personal funcionariu y llaboral del Parque Nacional. Belén Fernández resaltó amás que se trata un "acuerdu garantista" de la unidá, dao que "destierra definitivamente mieos de fragmentación o xestión compartida del mesmu".
  
Per otra parte, aprobáronse les memories del organismu autónomu Parques Nacionales, correspondientes a los años 2008 y 2009, nes que se constató que'l presupuestu d'inversión creció de forma constante dende l'añu 2006, nun millón d'euros. Amás, nel añu 2009, les inversiones crecieron un 7% sobre l'añu anterior, superando la cifra total de trés millones d'euros.
  
No que se refier a visitantes nel añu 2009, la llegada foi un 6 por cientu superior a la del añu anterior, hasta asitiase en dos millones de persones, lo que fai de Picos d'Europa'l segundu Parque Nacional más visitáu d'España, dempués del Teide, y el primeru de la península.
  
Según datos del Gobiernu asturianu, Picos d'Europa beneficióse d'inversiones por importe de cuatro millones d'euros con cargu al Plan E, n'obres como la rehabilitación de dellos trechos de la Ruta'l Cares, la meyora d'usu públicu na Senda d'Arcedianu, l'arreglu del dique del Llagu Ercina y otres actuaciones como meyores en delles pistes, roces y proyectos de caltenimientu, como'l rellacionáu cola flora autóctona.