La Llei y el so cumplimientu

Nos años 80 y 90, los intentos de facer funcionar una Xunta de Toponimia teníen fracasao por diverses razones que nun ye'l casu esplicar equí. Finalmente, en mayu del añu 2004, y siendo Carlos Madera presidente y esti que firma secretariu, púnxose en marcha l'actual Xunta Asesora de Toponimia del Principáu d'Asturies (XAT), qu'entamó por fin a recoyer ésitos, y que depués, a partir del 2007, siguió y sigue funcionando sumando más ésitos tovía baxo la presidencia de Consuelo Vega y siendo secretaria Antonia Pedregal.

Cuando digo ésitos refiérome simplemente a cumplir la Llei. Refiérome, concretamente, al cumplimientu de la Llei 1/98 de 23 de marzu d'Usu y Promoción del Asturianu (BOPA del 28 de marzu de 1998) y a los dos decretos del añu 2002 que regulen l'actual procesu de normalización toponímica: el decretu 38/2002 de 4 de abril pol que se regula la Xunta Asesora de Toponimia del Principáu d'Asturies (BOPA del 19 d'abril del 2002) y el decretu 98/2002 de 18 de xunetu pol que s'establez el procedimientu de recuperación y fixamientu de la toponimia asturiana (BOPA del 23 d'agostu del 2002). La Llei, nel so artículu 15.1, diz: «Los topónimos de la Comunidad Autónoma del Principado de Asturias tendrán la denominación oficial en su forma tradicional. Cuando un topónimo tenga uso generalizado en su forma tradicional y en castellano, la denominación podrá ser bilingüe. Los decretos dicen: «El Consejo de Gobierno, previo dictamen de la Junta Asesora de Toponimia, determinará mediante Decreto, los nombres oficiales de los concejos, sus capitales, parroquias rurales y núcleos de población».
 
Propiamente, la oficialización de los topónimos nun depende de la XAT, sinón del Gobiernu d'Asturies, que publica los correspondientes decretos en BOPA. El decretu d'oficialización toponímica del Conceyu de Xixón salió publicáu en BOPA del 3 d'ochobre del 2006, con corrección del 14 de noviembre del 2006. Nél lléese, artículu 2: «Los topónimos así determinados tienen la consideración de denominaciones oficiales, sustituyendo a las anteriormente vigentes, si las hubiere». Y la disposición final primera diz: «A partir de la entrada en vigor del presente Decreto, las Administraciones Públicas adecuarán de manera progresiva, de acuerdo con sus disponibilidades presupuestarias y, en todo caso, al momento de su renovación, las rotulaciones en vías públicas y carreteras así como de mapas y planos oficiales a las formas toponímicas establecidas en el presente Decreto».
 
Va poco, foi noticia qu'un ciudadanu de Xixón, al renovar el DNI, vio cómo-y poníen únicamente «Gijón», y cuando pidió que se-y punxere'l nome oficial «Gijón / Xixón», nun se-y dio satisfacción nenguna, polo que presentó una reclamación. Ye claro que l'aplicación d'una normativa llegal nueva non siempre pue ser automática. Entiéndese perbién qu'al otru día d'aprobase una llista toponímica, ye imposible que tolos lletreros de carretera, tolos mapes oficiales, tolos vehículos, tolos documentos, tolos sistemes informáticos tengan acuriosada la toponimia oficial. Pero si ye'l propiu ciudadanu'l que reclama que se cumpla la llegalidá, lo normal ye disculpase y da-y al ciudadanu garantíes de cuándo y cómo esa llegalidá va cumplise.
 
L'interesáu, Inaciu Galán –ex-alumnu na Universidá d'Uviéu y home conocíu nel mundu de asturianismu–, plantéalo como falante d'asturianu que ve conculcáu un derechu, y tien tola razón en plantealo asina, pero lo cierto ye que, nel moxicu del asuntu, lo qu'hai ye simplemente un incumplimientu de la llei, y dende un puntu de vista técnicu el fechu de que se refiera al asturianu podríemos mesmamente consideralo secundario o irrelevante. Será la llingua asturiana la que ta en cuestión nesti incidente. Guapamente. Pero más en cuestión ta la Llei y el so cumplimientu. Pues agora ye cuando se fai bien verdá que la Llei nun conoz d'ideoloxíes, y tar ta pa cumplise.
 
Ramón d'Andrés
(Miembru de la Xunta Asesora de Toponimia del Principáu d'Asturies)