El PP llevará les cuentes de Llaboral Escena a la Sindicatura

|

El Grupu Parllamentariu Popular na Xunta Xeneral va solicitar a la Sindicatura de Cuentes la so intervención en Llaboral Escena pa investigar les cifres económiques d'esti proyeutu.

Nos últimos seis meses, según datos de los populares, namás cubrió un 12% de los sos gastos cola venta d'entraes. Asina lo anunciaron güei los diputaos populares Emilio Pérez Cueva y Elma Alonso, mientres una rueda prensa na que criticaron el "fracasu" del proyeutu de Llaboral, "pola so descoordinación, improvisación y espilfarru".
  
Alonso ofreció datos de les cuentes que muestren les actividaes de Llaboral Escena en función de les ventes d'entraes. Según les mesmes, nos últimos seis meses gastáronse 445.145 euros na contratación de los diversos espectáculos, mientres que los ingresos fueron de 55.126 euros, un 12,5%. Son les programaciones realizaes ente'l 9 d'ochobre del 18 d'abril. La parllamentaria criticó que nun se-y facilitaren los datos del periodu anterior del 2009. Eso sí, recordó los númberos del 2008: los beneficios fueron un 16% de los gastos, con un total de 5.500 entraes vendíes.
  
Cueva destacó obres concretes como 'Cuando las piedras vuelan' (9 y 10 d'ochobre), que costó 65.000 euros y vendió un total de 246 entraes, con una recaudación total de 4.130,95 euros. Tamién señaló'l casu de 'Walking next to our shoes... intoxicated by straberries and cream, we enter continents without knocking', el 12 y 13 de febreru, con un costu de 31.700 pa un total de 84 espectadores, con una recaudación de 884,30 euros.
  
"Too ye asina", comentó Cueva, "pese a presentamos como escelentes los datos de tolo que se programaba, unos númberos qu'igual incluyíen a la xente que pasara pellí delantre pasiándose". Remitióse amás a les crítiques que, según el diputáu, se faen dende'l mesmu sector escénicu asturianu, considerando'l de Llaboral Escena "un plantegamientu elitista". "Alvertíen tamién que los espectáculos más sovencionaos son los que menos lleguen a el espectadores asturianos", recordó'l parlamentariu, que criticó tamién que "nun se contó colos profesionales nin los grupos de teatru d'equí".
  
"La ética y la vanguardia son compatibles", afirmó'l diputáu, pero "la ética nun ye compatible colos caradures nin colos 'iluminaos'".
  
Cueva atacó directamente al ex direutor de programación de Llaboral Escena, Mateo Feijó, al qu'acusó tamién de "duplicidá", recordando que contrató l'actuación d'un grupu de ballet de Galicia, por él representáu. Alonso criticó amás los honorarios del responsable del proyeutu: 136.468 euros en 2008 y más de 170.000 en 2009. El parlamentariu acusólu "d'amparase" en "nun sé qué vanguardia que yá se ve lo qu'interesó al públicu asturianu, too ello visto como normal y lóxicu pola Conseyería".
  
Asina, responsabilizó, non a Feijó, sinón a la conseyera de Cultura, Merced Álvarez, y el viceconseyeru, Jorge Fernández Lleón, que "dilapidaron el dineru de tolos ciudadanos, invirtiendo partíes millonaries nes que yera fácil prever el resultáu". Pidió poro la dimisión d'ambos cargos, amás d'adelantar la solicitú que'l PP va facer a la Sindicatura de Cuentes pa qu'investigue esta situación de "Llaboral Ciudá de la vergüenza", ironizando asina col verdaderu nome del proyeutu cultural, Llaboral Ciudá de la Cultura.
 
Desapaición del gallu montes
 
La Presidencia de la Xunta Xeneral almitió a trámite esta selmana una batería de preguntes del diputáu del PP, Alfonso Román López, sobre la posible desapaición del gallu montés.
"¿Qué motivos determinaron el fracasu del Plan de Caltenimientu del Hábitat del Gallu Montés?", va preguntar Román López al conseyeru de Mediu Ambiente, Ordenación del Territoriu y Infraestructures, Francisco González Buendía.
  
Les preguntes, consultaes por Europa Press, tienen carácter d'urxencia. El PP señala que l'ave ta a puntu de desapaecer nel Principáu. Asina, Román López va interesase poles nueves directrices y midíes que se van a adoptar dende'l Principáu pa recuperar la especie.
  
"¿Representen actuaciones como la que se desarrolla nel Centru d'Interpretación de la Naturaleza de Redes un exemplu de les nueves directrices y midíes coles que, al paecer, el Principáu d'Asturies piensa salvar al gallu montés de la desapaición n'Asturies?", enturgará tamién al Gobiernu'l diputáu del PP Alfonso Román López.
  
Precisamente esta selmana, el Fondu pa la Protección d'Animales Salvaxes (Fapas), y los vecinos de la parroquia de Páramo de Teberga, acusaron  Principáu d'Asturies d'evitar la recuperación del gallu montés.

Contador Estadistiques