Cultura calca en que les pieces de la Campa Torres tán llocalizaes

Mercedes Álvarez afirmó que tolos materiales procedentes de les escavaciones de la Campa de Torres tán "llocalizaos" y añadió qu'añmás solicitáronse delles pieces pal Arqueolóxicu.

Dixo amás, a preguntes del diputáu d'IU-BA-Verdes, que tán dispuestos a presentar a la Fiscalía, si asina lo pidiera, la información referente a la totalidá de les escavaciones. "Esto nun se produz pola preocupación del PP pol patrimoniu nin poles pieces, produzse namás pa facer d'una situación non afortunada un escándalu pa demonizar a un investigador y al Conceyu de Xixón", dixo la conseyera.

Álvarez compareció güei en comisión a solicitú del Grupu Parllamentariu Popular, pa qu'informare sobre tolo relacionao col paraderu y llocalización d'un conxuntu de más de 20.000 pieces procedentes de les escavaciones de la Campa Torres, en Xixón, de toles escavaciones feches nesti Parque Arqueolóxicu a lo llargo de la so esistencia y sobre otres cuestiones rellacionaes.
  
La conseyera indicó que les investigaciones de la Campa Torres sometiéronse a dellos y variables controles, tanto que ye una de les más controlaes investigaciones realizaes nos últimos años na rexón. "Nun consta nenguna infracción al respecto de les mesmes", dixo la conseyera qu'añadió que se ta trabayando pa crear un rexistru "sin precedentes xuntu colos arqueólogos.
  
Sobre les pieces apaecíes, Álvarez indicó que yá dio cuenta de tolo asocedío nun Plenu de la Xunta y fizo un percorríu por toes y caúna de les investigaciones desarrollaes, dexando claro que "toes contaron colos permisos y informes pertinentes". Dixo amás que tán siendo correxíos nos últimos años algunos aspectos como que los investigadores queden coles pieces hasta qu'acaben los sos estudios, como asocedió na Campa Torres, puesto qu'hasta'l 2001 la Llei nun establecía plazos pa entregar les pieces.
  
Calcó en que nun-y consta la comisión d'infracciones nes escavaciones de la Campa de Torres y reprochó al PP que si consideraba qu'esistíen tales infracciones nun preguntara poles mesmes en toos estos años. Insistió en que les pieces de les que fala'l PP yeren yá conocíes y yá s'escoyeren nel so día pa una esposición na Campa.
  
El diputáu del PP, Alfonso Román López, manifestó que la esposición de la conseyera "nun valió pa nada", porque al so xuiciu'l motivu pol que comparez tien que ver cola apaición de "miles de pieces nun zulu, y sintiendo la esposición de la conseyera da la sensación de que too ta clasificao".
  
Asina, Román López, recordó que'l Conceyu "nun tenía nin rexistru, nin inventariu, nin seguru de tales pieces por desconocer la so esistencia" y amás manifestó que les mesmes taben en mala traza, tal que destaca directora de la Fundación Municipal de Cultura, Educación y Universidá Popular de Xixón, Pilar González Lafita, nuna carta enviada a la mesma conseyera.
  
Refirióse tamién a declaraciones de la directora del Parque, Paloma García, nes que fizo responsable de les pieces a los arqueólogos que nun dieron parte de les mesmes, como deberíen, y  poro aseguró que nun hai inventariu nin informe de les mesmes.
   "
Ta usté tratando d'esplicar lo inesplicable", dixo'l diputáu del PP, que "consideró la esistencia d'un inventariu científicu como la piedra angular de tol asuntu". "Ta usté metiendo la pata y asina va constar nel diariu de sesiones, porque buena parte de les caxes apaecíes tán sin inventariar y usté ta tratando de dicimos qu'esos restos nun tienen valor algún", dixo.
  
Pal PP la conseyera "testera" a lo hora de dar esplicaciones sobre'l "auténticu desastre y atentáu cultural" producíu na Campa Torres, polo qu'anunció que van pidir la comparecencia de la directora del Parque y tamién del ex director de les escavaciones.
  
El diputáu del grupu socialista, Alfonso Rei, encamentó a los 'populares' que  dexen actuar a la Fiscalía si de verdá consideren que se dieron tales irregularidaes, y llamentó que'l PP sólo quiera "enllamargalo too sin interesa-y realmente les esplicaciones al respecto".