Pa los impulsores de la Llei d'Usu ye absurdo diferenciar ciudananos

Marqués y Sánchez Vicente afirmaron que ye "absurdo" ya "inalmitible" que nun se permitan les comunicaciones n'asturianu de los funcionarios cola alministración.

Sergio Marqués yera presidente del Principáu pol PP nel momentu de l'aprobación de la Llei d'Usu, y Xuan Xosé Sánchez Vicente, diputáu del PAS, partíu col que'l Gobiernu pautó la norma.
 
En declaraciones a Europa Press, ambos refiriéronse a la interpretación que realizaron nel so día, primero l'Alministración autonómica, y dempués el xuez del Xulgáu númberu 3 de lo Contecioso Alministrativo d'Uviéu, Miguel Ángel Carbajo, de la Llei d'Usu, nel casu de Xurde Blanco. Esti abogáu del Principáu solicitó un permisu llaboral. Tres la denegación por tar escritu n'asturianu, recurrió al citáu xulgáu, que solicitó al Tribunal Constitucional (TC) que se pronunciara sobre la norma. Pese a avalar el TC el testu, el xuez refugó'l recursu, defendiendo les razones del Principáu: "nun tien derechu a relacionase cola Alministración del Principáu na llingua asturiana, cuando actúa na so condición de funcionariu".
 
"Ye absurdu que si te pues dirixir a l'Alministración n'asturianu, resulta que los funcionarios ente sí nun puean. Pertenez al capítulu del absurdu", comentó l'ex presidente Marqués. "Evidentemente, nesta vida too s'interpreta, pero nun se compadez nin col espíritu nin creo que cola lletra (de la llei)", señaló, dexando constancia de que l'oxetivu de la mesma "yera de promoción del usu, pero non específicamente condicionáu a talos ciudadanos en tales circunstancies, sinón polo xeneral".
 
Esta filosofía foi, según él, "unánime dafechu" ente los ellaboradores de la norma, añadiendo que "de nenguna manera se plantegó nengún problema d'esti tipu, y eso ye indiscutible", sentenció.

Pela so parte, Sánchez Vicente recordó que'l Tribunal Constitucional "interpreta lo mesmo" que Marqués. Consideró "bien sorprendente" que'l xuez fixere la consulta, y qu'énte la respuesta afirmativa del Constitucional el fallu fuere denegatoriu. "Los funcionarios, en cuanto usuarios de derechos, son ciudadanos como los demás, nun son miembros de l'Alministración que tienen que redactar disposiciones, sinón ciudadanos", consideró. Nesti sen, "la respuesta del constitucional ye clara. Hai poco más que dicir porque lo que ye evidente nun precisa munches más esplicaciones", añadió.
 
Pa Sánchez, ésta foi "la interpretación xeneral y nun cabe otra, o pue caber, pero ye raro que quepa". Dende'l so puntu de vista, el razonamientu de l'Alministración y del xuez ye una distorsión "de la llei y constitúi un recorte de derechos y de llibertaes, dende'l nuesu puntu de vista, inalmitible"

.