UNA recuerda a los revolucionarios de 1808

UNA va homenaxarear a los revolucionarios que proclamaron soberana la Xunta Xeneral y recordar la creación de la bandera asturiana en 1808 y la so recuperación por Conceyu Bable.

La organización nacionalista va conmemorar n’Uviéu’l 25 de mayu, “fecha na qu’Asturies entró na era contemporanea cola proclamación en 1808 de la soberanía de la Xunta Xeneral, la rebelión del pueblu asturianu en defensa de la llibertá, l'unvíu d'embaxadores a Inglaterra, la creación del Exércitu Asturianu y el diseñu de la nuesa bandera”.
 
Los actos van entamar a les 20.30, con una ufrienda floral de la Xunta Executiva d'UNA na puerta de la Sala Capitular (Corrada del Obispu), llugar onde la Xunta Xeneral realizó la proclamación de soberanía en 1808.

Darréu vendrá una llectura de poemes rellacionaos col acontecimientu de poetes asturianos representativos de distintes xeneraciones. Amás del saludu de militantes de Conceyu Bable y del asturianismu nos 70 y 80, nel que van comentar el procesu de recuperación de la bandera asturiana.

Del memu mou, l’actu cuntará coles intervenciones del voceru d’UNA-Mocedá, Belarmino Álvarez, y del voceru de la Xunta Executiva Nacional d'UNA, Faustino Zapico, qu’amás ye historiador y autor del llibru "La revolución de 1808".

Piesllará l’actu una pieza de gaita y la ‘Cena 25 de mayu’, que va facese nun local (C/ San Antonio esquina Calle de la Rua) asitiáu nel llugar onde se produxo'l primer motín que llevaría al posterior llevantamientu.
 
Estos actos enmárquense na reivindicación qu'UNA realiza de la fecha del 25 de mayu, que la organización quier qu’entre dientro del calendariu festivu. El coordinador d'UNA, Miguel Ánxel Díez indicó esta selmana que "esta fecha pasa tolos años ensin pena nin gloria y ensin nengún tipu de reconocencia institucional y yá ye'l momentu de camudar esta dinámica".

UNA propón tamién que se recupere y divulgue la redolada de la Sala Capitular, onde tuvo llugar la xunta de la Xunta Xeneral y la proclamación de soberanía, como un llugar emblemáticu y simbólicu pa la identidá asturiana.