Más de 61.000 funcionarios van vese afeutaos pol recorte salarial

Sobre 61.000 funcionarios d'Asturies van vese afeutaos pol recorte de retribuciones de los emplegaos públicos aprobáu'l pasáu xueves en Conseyu de Ministros.

D'esta manera, Asturies ocupa'l quintu puestu ente les comunidaes menos perxudicaes pol recorte salarial anunciáu pol Gobiernu, según indicó'l colectivu de los Técnicos de Facienda (Gestha) al traviés d'una nota de prensa recoyida por Europa Press.
  
Por comunidaes, según el plan d'axuste previstu pol Gobiernu, Andalucía va ser la comunidá autónoma na que se van ver afeutaos un mayor númberu d'emplegaos de l'Alministración, con 499.974 funcionarios. De siguío asítiense la Comunidá de Madrid, con 427.650 emplegaos, Cataluña (302.072), la Comunidá Valenciana (228.453) y Castiella y Lleón (174.784 emplegaos).
  
Otres comunidaes como Galicia (153.580 funcionarios), Castiella-La Mancha (133.679), Canaries (126.045), País Vascu (109.662 emplegaos) y Estremadura (93.993 funcionarios) van vese menos afeutaes pol recorte según la so plantiya d'emplegaos públicos.
  
D'otra manera, La Rioxa (16.477 emplegaos), Navarra (33.902), Baleares (55.723) y Asturies (61.086 emplegaos) van ser les menos afeutaes por tener tamién una plantiya menor, siguíes de Murcia (85.667 emplegaos) y Aragón (92.388).
  
Gestha esplicó que'l recorte de retribuciones de los emplegaos públicos namás s'aplica de forma progresiva al xornal base y l'antigüedá, mientres que s'amenorguen de forma llinial los complementos fixos, que son los qu'estremen realmente'l sueldu de los funcionarios. Sicasí, el Gobiernu nun precisó que'l recorte algame al complementu de productividá, que ye precisamente'l que perciben en mayor proporción los altos funcionarios.