Descubren un arrecife de corales a 800 metros de fondura

Un equipu de xeólogos de la Secretaría Xeneral del Mar y de biólogos del Institutu d'Oceanografía descubrió un petón de corales a más de 800 metros de fondura nel Cantábricu.

El descubrimientu prodúxose mientres la campaña a bordu del buque oceanográficu Vizconde de Eza, perteneciente a la Secretaría Xeneral del Mar, y nel marcu del proyectu Indemares, según informó'l Ministeriu de Mediu Ambiente y Mediu Rural y Marín.

L'oxetivu principal d'esti proyeutu, coordináu pola Fundación Biodiversidá, ye contribuyir a la proteición y usu sostenible de la biodiversidá nos mares españoles pente medies de la identificación d'espacios de valor pa la Rede Natura 2000. Esti descubrimientu supón un importante llogru pa la ciencia, puesto que se desconocía hasta la fecha la esistencia d'esti tipu de petones fondos de coral n'agües del Estáu.
  
Mientres munchos años estos ecosistemes, con elevaos índices de biodiversidá, vinculáronse a zones tropicales d'agües templaes y bien allumaes por cuenta de la so dependencia d'algues simbiontes. El desarrollu de modernos robós y submarinos permitió descubrir petones de coral n'agües fríes y fondes en munches zones del planeta, onde habiten grupos d'especies desconocíes pa la ciencia y que, ente otres munches característiques, son a frenar el cambiu climáticu al ser sumideru de carbonu, menguando la presencia de gases d'efeutu ivernaderu na atmósfera.
  
Mientres esta primer campaña del proyectu Indemares na zona d'influencia del Cañón d'Avilés, denominada Indemares-Avilés 0410, un equipu multidisciplinar formáu por especialistes en xeoloxía y bioloxía entamó la primer fase del estudiu dirixida a conocer les característiques de los ecosistemes y cartografiar los sos hábitats y comunidaes. Pa ello utilizaron modernes tecnoloxíes, que-yos permiten llograr datos mui válidos hasta 5.000 metros de fondura.
 
Sistemes de cañones

D'esta manera, cartografióse un área de más de 6.400 kilómetros cuadraos y nel momentu de los estudios realizáronse importantes descubrimientos, como la esistencia d'un complexu y desconocíu sistema de cañones tributarios al exe principal del d'Avilés y que vierten finalmente a la llanura abisal del Golfu de Vizcaya nun solu depósitu d'abanicu, asitiáu a 4.800 metros de fondura.
  
Ún d'estos cañones tributarios, de 16,5 kilómetros de llargor y 6,1 kilómetros d'anchor máximu, presenta aspectos singulares tanto no que fai a les sos característiques xeolóxiques y dinámica de corrientes, según por identificar nél y a gran fondura un destacable y bien estructuráu arrecife de corales d'agües fríes.
  
Pa poder determinar les sos característiques tomaron muestres biolóxiques y realizáronse inmersiones con un vehículu autómata dotáu de cámares de fotos y videu, lo que permitió descubrir que les principales especies estructurantes del petón son los corales Madrepora oculata y Lophelia pertusa, qu'eleven considerablemente la complexidá del hábitat, polo que se ven acompañaes d'otres especies de gorgonies, antipatarios, esponxes de cristal, equinodermos, cámbaros reales y pexes, aumentando considerablemente la biodiversidá en relación al restu de los fondos estudiaos mientres la campaña.