El Bloque decide mañana la so continuidá nel Gobiernu

El Bloque por Asturies celebra mañana sábadu, nel Hotel Loriga de La Pola Siero, la so Conferencia Nacional, onde van decidir la so política d’aliances énte les eleiciones de 2011.

La organización recuerda que’l Congresu vien depués de dos meses de debate internu y múltiples aconceyamientos con organizaciones sociales, polítiques y sindicales.

Na Conferencia Nacional, órganu de debate y toma de decisiones de calter extraordinariu ente conceyos nacionales, participen con voz y votu les 20 persones que formen parte de la Xunta Nacional, órganu de representación de los conceyos, y les 10 persones que formen parte de la Direición Nacional.

La Conferencia Nacional tratará la posición del Bloque por Asturies énte la propuesta de construcción d’una planta incineradora n’Asturies. Amás de les consecuencies sociales y polítiques de les midíes de recorte económicu del Gobiernu d´España.

Ente los temes clave ta la política d´aliances del Bloque énte les eleiciones de 2011, polo que se prevé que la organización decida sobre la posible salida o continuidá nel Gobiernu asturianu.