Fapas acusa al Principáu de torgar la recuperación del gallu montés

El Fondu pa la Protección d'Animales Xavaces (Fapas), y los vecinos de la parroquia de Páramo de Teberga, acusaron güei al Principáu d'evitar la recuperación del gallu montés.

Según señalaron dende Fapas, depués de meses de solicitar permisos pa la recuperación del hábitat del gallu montés nel Conceyu de Teberga, la Conseyería de Mediu Rural nun autorizó los trabayos.
  
Esplicaron que dende l'añu pasáu la Parroquia Rural de Páramo de Teberga y el Fapas pretenden desarrollar actuaciones que meyoren la calidá del hábitat del gallu montés y que l'añu pasáu solicitáronse los permisos pa trabayar sobre una superficie de 50 hectárees de terrenos, col fin de recuperar les arandaneres, la planta que resulta estratéxica nos trabayos de protección d'esti animal. "Sicasí, nun hubo nenguna respuesta a la solicitú per parte de la Conseyería de Mediu Rural del Principáu d'Asturies", llamentaron.
    
Asturies tien un Plan de Recuperación del Gallu Montés qu'establez como actuación prioritaria la recuperación del hábitat d'esta especie que ta en máximu peligru d'estinción. Asina, consideraron "contradictoriu" que la mesma Alministración Rexonal torgue la realización de trabayos de caltenimientu.
  
Fapas señaló que la recuperación del hábitat del gallu montés ye la clave pa tratar de consiguir qu'esta especie nun desapaeza de los montes asturianos.