En 80 estaos del mundu la homosexualidá ye illegal

Xega presenta una unidá didáctica escolar sobre derechos LGTB. Nella, pue vese que 80 estaos condenen la homosexualidá, mientres que 5 castiguen cola muerte.

El pasáu llunes cumpliéronse 20 años de la descatalogación de la homosexualidá como enfermedá mental pola OMS y Xega, colectivu de lesbianes, gais, transexuales y bisexuales (LGTB) d'Asturies, celebra’l Día Mundial contra la homofobia, la transfobia y la bifobia, “una fecha que sigue siendo necesaria pa recordar que les distintes orientaciones sexuales ya identidaes de xéneru son motivu d'una discriminación que tien de ser erradicada de la sociedá”.

Poro, y per tercer añu, ILGA (International Lesbian, Gay, Bisexual, Trans and Intersexual Association) publicó'l so ‘Informe añal sobre homofobia d'Estáu nel mundu’, “faciendo públicos y acusando a los Estaos que, a estes algures del sieglu XXI, inda siguen tratando a los sos ciudadanos y ciudadanes LGTB como personas de segundu rangu, que nun  merecen nenguna considerancia”.

Nun resume del informe editáu por Xega, pue vese qu’hai 80 países nel  mundu que consideren la homosexualidá como illegal y que, en cinco d'ellos -Irán, Mauritania, Arabia Saudita, Sudán y Yemen- y en dellos llugares de Nixeria y Somalia, los actos homosexuales pueden ser castigaos cola muerte.

Esta unidá didáctica ye complementaria al Mapa de los derechos LGTB nel mundu, tamién editáu por XEGA, y distribuyíu nos cerca de 400 centros escolares públicos el pasáu ún d'avientu con motivu del Día Internacional de los Derechos Humanos.
 
14 años por casase
 
Un tribunal de Malaui condenó esti xueves a 14 años de cárcel a Steven Monjeza y Tiwonge Chimbalanga, los dos homosexuales deteníos a últimos del añu pasáu por intentar casese y a los que se declaró culpables el pasáu martes de sodomía y indecencia.
  
A Steven Monjeza, de 26 años, y Tiwonge Chimbalanga, de 20, detuviéronlos el pasáu mes d'avientu mientres celebraben una ceremonia tradicional de compromisu matrimonial. El so oxetivu yera casase esti añu.
  
"Condeno a ambos a la pena máxima porque quiero torgar que los nuesos fíos y fíes de Malaui los imiten y celebren matrimonios dientro del mesmu sexu, dalgo impropiu de Malaui y que nun s'adauta a les nueses creencies culturales y relixoses", declaró'l xuez, Nyakwawa Usiwa-Usiwa.
  
El xuez argumentó'l pasáu martes que los dos homes practicaren actos homosexuales "contrarios al orde natural". Monjeza y Chimbalanga negaron los cargos y los sos abogaos denunciaron que se violaron los sos derechos constitucionales.
  
Les organizaciones de Derechos Humanos, como Amnistía Internacional, reclamaron el pasáu martes la inmediata y incondicional lliberación de la pareya y denunciaron que se violaren descaradamente los sos derechos humanos.
  
La llexislación malauí persigue la homosexualidá. Tanto'l Centru pal Desarrollu del Pueblu como'l Centru pa los Derechos Humanos y la Rehabilitación pidieron a les autoridaes que moderen la so postura nesti sen. Los sos donantes occidentales tán presionando al Gobiernu africanu por esta mesma cuestión.