UNA quier que Mercedes Álvarez pague la indemnización a El Ferreiro

UNA esixe la realmisión d’El Ferreiro y anuncia que va estudiar la forma de que la Conseyera de Cultura pague personalmente los 25.529,28 € d'indemnización, en casu de non realmisión.

Unidá Nacionalista Asturiana quixo treslladar la so felicitación a Pepe El Ferreiro, “ún de los mayores referentes nel caltenimientu del padremuñu d’Asturies”, pola sentencia que declara'l so despidu como direutor del Museu Etnográficu de Grandas de Salime como improcedente.

“Esta sentencia nun fai otro que confirmar que'l so cese foi puramente políticu y dientro de la estratexa del Gobiernu asturianu d'acabar con too aquello que puede suponer el caltenimientu y valorización del padremuñu cultural d’Asturies”, señalen dende la organización.

Ignaciu Llope, como voceru de cultura de la organización, declaró que “esta sentencia ye'l fin del esperpentu, polo qu’esiximos la so inmediata readmisión, al igual que les disculpes públiques de tolos implicaos nesti cese vergoñosu, porque como demuestra la sentencia les causes pal so cese nun son más que xides simples ensin fundamentu”.

UNA tamién alvierte a la Conseyera de Cultura, Mercedes Álvarez, qu’en casu de que'l Principáu opte por indemnizar a Pepe'l Ferreiro con 25.529,28 €, que ye que lo que-y correspuende en casu de non realmitilu, van estudiar les posibles víes llegales pa que esi dineru salga del so bolsu, “non del bolsu de tolos asturianos que nun tenemos que pagar los sos caprichos”.

“Cuando la sociedá se moviliza contra'l réxime caciquil impuestu n’Asturies pola FSA, pue faese frente a les sos arbitrariedaes y plantegar respuestes a les mesmes”, apuntó Inaciu Llope, al empar qu’esixó “ser conscientes de que caltener a esti gobiernu ye que se repitan estos ataques al padremuñu y dignidá d’Asturies, lo que tendría que faer cavilgar a munchos que se declaren defensores de la nuesa cultura”.