“La política marítima sostenible d'Europa fai agües en Xixón”

Los ecoloxistes denuncien que n'Asturies la mar depende del interés industrial y urbanísticu, cola idea del "gran vertideru", mientres qu'obres y dragaos realícense ensin valorar l’impactu.

Güei Xixón acueye la celebración del Día Marítimu Européu, ún de los acontecimientos más importantes de la Presidencia Europea d'España, que tien como tema principal la innovación pa una crecimientu sostenible nel sector de l'actividá marítima y les zones costeres. Coincidiendo cola fecha, la Coordinadora Ecoloxista recuerda que la realidá del Cantábricu atópase lloñe d'algamar la meta del equilibriu col mediu ambiente y el respetu a la calidá de vida de los habitantes de la mariña.

Los ecoloxistes denuncien que na actualidá, los principales problemes de la mar n'Asturies son l'ampliación de los puertos, los dragaos, los vertíos, el tresporte de materiales peligrosos, l'almacenamientu de CO2, la sobrepesca y la destrucción de la pesca artesanal.

Recuerden que va pocos díes la Comisión Europea denunciaba énte'l Tribunal de Xusticia de la Unión Europea al Conceyu de Xixón por vertir la metá de les sos agües negres ensin depurar al Cantábricu. Señalen tamién qu'hai poblaciones enteres con depuradores insuficientes pal volume de vertíos que tienen, "que van a los rios contaminandolos qu'acaben nel mar”.

Del mesmu mou, falen del tresporte marítimu como una fonte de vertíos, “mientres aumenta’l tráficu de mercancíes peligroses”. A lo que sumen la construcción d'instalaciones como les plantes regasificadores, “les de Ferrol, Bilbao y la empecipiada va pocos meses en Xixón suponen la esistencia de tres regasificadores nuna mariña de malapenes 500 kilómetros"..

Al empar, critiquen los impactos ambientales de l'ampliación de los puertos d’El Musel y d'Avilés, “tán faciéndose sentir en tola mariña”. Solliñen tamién que’l Gobiernu Español acutó una amplia área de la mariña asturiana pal almacenamientu de CO2, “que tresformaría la mariña asturiana nun gran vertideru de gas peligrosu”, apunten.
 
Los ecoloxistes camienten qu’l Gobiernu Español ta fomentando la desapaición de la pesca artesanal, “tan importante hestóricamente n'Asturies”, mientres sofita la construcción y meyora de grandes barcos pa les compañíes industriales, “destruyendo empleos y fomentando una pesca bien agresiva que destrúi'l mediu marín”.
 
Pa finar recuerden qu’hai proyeutos pa la construcción de miles de viviendes na mariña asturiana, “dalgunes sobre les mesmes arenes”.