Nun soi como les demás, soi “ternera” asturiana

La nueva campaña de promoción de la carne de xata quier fuxir de los mensaxes institucionales y coneutar col públicu. Sicasí, pa promocionar la ‘ternera’ l’asturianu sigue ensin esistir.

La campaña de comunicación de la Indicación Xeográfica Protexía “Ternera Asturiana’, básase nun nuevu personaxe: una vaca que va facer de mascota del sellu de calidá. L'actu cuntó cola participación del cocineru con dos estrelles Michelín Nacho Manzano y del pentacampeón mundial de piragüismu Manolo Busto, amás del propiu conseyeru de Mediu Rural y Pesca, Aurelio Martín.
 
Dientro de la nueva campaña de comunicación y publicidá “No soy como las demás. Soy de la IGP, Soy Ternera Asturiana”, el Conseyu Regulador apuesta pol desenvolvimientu d'esti personaxe, que camienten que va ayudar a tresmitir un mensaxe gayoleru y averáu al públicu, yá que “l'usu d'una comunicación en tonu institucional pue actuar de frenu nel treslláu de los mensaxes”.

Pa reforzar a campaña, van usase nuevos canales de comunicación como les redes sociales y un nuevu conceutu d'imaxe nos puntos de venta. L'oxetivu, indiquen, ye conectar con mayor facilidá colos distintos públicos potenciales consumidores de xata asturiana, dende'l públicu infantil, hasta'l públicu xuvenil y adultu.

Pa ello, van desenvolvese campañes específiques pa cada perfil, asina como eventos y acciones de sofitu nel ámbitu deportivu, como na Vuelta Ciclista a Asturies, nel tornéu Tenis Sablera de Lluanco o nes competiciones de Manolo Busto. Asina como nel ámbitu cultural o gastronómicu.