L'equipu arqueolóxicu de los Guerreros de Xian, Premiu Príncipe

L'equipu arqueolóxicu de los Guerreros y Caballos de terracota del Mausoléu de Qinshihuang en Xi'an resultó galardonáu col Premiu Príncipe d'Asturies de Ciencies Sociales 2010.

Consideráu ún de los descubrimientos arqueolóxicos más importantes del sieglu XX, el yacimientu de los guerreros de Terracota, tamién conocíos como Guerreros de Xi'an, ye una fonte d'información d'estraordinaria riqueza sobre la civilización china.

El Xuráu d'esti Premiu convocáu pola Fundación Príncipe d'Asturies na so XXX edición tuvo presidíu por Manuel Fraga Iribarne y integráu por Lluis Xabel Álvarez, Gonzalo Anes y Álvarez de Castrillón, marqués de Castrillón, Raúl Bocanegra Sierra, María Emilia Cases Baamonde, Leslie Crawford, José Luis García Delgado, Severino García Vigón, Manuel Jesús González, Luis González Seara, Carmen Iglesias, Manuel Menéndez Menéndez, Adolfo Menéndez Menéndez, José Manuel Oteru Novas, Alberto Pico Maeso, Rafael Puyol Antolín y Juan Vázquez García (secretariu). Esta candidatura propúnxola Carlos Blasco Villa, embaxador d'España en China.
  
Descubiertu en 1974 y declaráu Patrimoniu de la Humanidá pola UNESCO en 1987, el yacimientu de los Guerreros de Xi'an forma parte del mausoléu funerariu de Qinshihuang (221-207 a.n.y.), el primer emperador qu'unificó los territorios de China y fundó la dinastía Qin. La so apaición tuvo un gran impactu na investigación de la escultura, l'arquitectura y la sociedá china mientres esi periodu de formación y consolidación del Imperiu.
  
Esti grandiosu complexu funerariu ye nesti momentu ún de les ayalgues más destacaes de l'arqueoloxía china. Asitiáu nes cercaníes de Xi'an, antigua capital imperial na que güei ye la provincia de Shaanxi, l'exércitu ta formáu por más de 7.000 figures de guerreros y caballos de terracota de tamañu natural, soterraes en formación de batalla, a poca distancia de la tumba del primer emperador de la dinastía Qin.
 
El descubrimientu casual d'una estatua de grandes dimensiones llevó a l'apaición de lo que güei se conoz como fosa númberu 1. Esti espaciu ye una gran cámara soterraña rectangular de 230 metros de llargor, orientada d'este a oeste, y 62 metros d'anchor de norte a sur. Nel so interior apaecieron unes 6.000 estatues de guerreros, carros y caballos de terracota dispuestos n'once pasiellos de trés metros d'anchu y 200 metros de llargu.
  
Dos años depués, en 1976, apaeció la fosa númberu 2, asitiada a unos 20 metros al norte de l'anterior. Más pequeña, acueye una colección de caballería con más de 1.400 pieces, ente caballos y caballeros, distribuyíos en 14 files, y protexíos por arqueros. Al poco tiempu, atopóse la tercer fosa, la más pequeña, con 68 figures d'oficiales, comandantes y xenerales.
  
Tolos rostros de les figures tienen traces distintes, puesto que los moldiaron ún a ún, mientres que bustos y estremidaes realizáronsecon moldes. Coles mesmes, pue distinguise nes figures gran diversidá de vestimentes y peñaos, en función del personaxe que quisiere representase.
  
Estímase que la construcción del mausoléu duró sobre unos 38 años y que na so construcción participaron cientos de miles d'obreros y artesanos. El mausoléu abrióse al públicu como muséu en 1979, y, de a partir d'ehí, recibió más de 60 millones de visitantes de tol mundu.
  
Recientemente, nel añu 2007, apaeció un edificiu soterráu de 30 metros d'altor, que podría tar sobre la tumba de Qinshihuang, baxo una llomba artificial d'unos 51 metros d'altor.
  
L'Institutu d'Arqueoloxía de Shaanxi reveló que, al traviés de técniques de detección remota, detectárase la estructura d'una cámara con cuatro parés y un grupu d'escaleres simétriques, anque hasta'l momentu nun se procedió a la so escavación.
  
Los científicos tamién detectaron la esistencia d'un avanzáu sistema de drenaxe, qu'evitaría que les filtraciones d'agua inundaren la tumba. Según los espertos, los descubrimientos realizaos hasta'l momentu son bien importantes, pero tovía queden munchos trabayos por facer, puesto que se trata d'ún de los descubrimientos arqueolóxicos más relevantes de China y la so escavación y caltenimientu plantega enormes dificultaes técniques.
  
Los Premios Príncipe d'Asturies tán destinaos, según el so Reglamentu, a galardonar "el llabor científicu, técnicu, cultural, social y humanu realizáu por persones, equipos de trabayu o instituciones nel ámbitu internacional". Dientro d'esti espíritu, el Premiu Príncipe d'Asturies de les Artes "va concedese a la persona, institución, grupu de persones o d'instituciones que desarrollaren un llabor na Arquitectura, Cinematografía, Danza, Escultura, Música, Pintura y demás espresiones artístiques, que constituya una aportación relevante al patrimoniu cultural de la Humanidá".
  
Nesta edición acudíen un total de 23 candidatures procedentes d'Alemaña, Arxelia, Arxentina, Brasil, Canadá, China, Ecuador, Estaos Xuníos, Francia, India, Irán, Marruecos, Noruega, Perú, Polonia, Reinu Xuníu, Tailandia y España.
  
Este foi'l segundu de los ocho Premios Príncipe d'Asturies que se conceden esti añu, en que cumplen la so trixésima edición. Nes próximes selmanes van fallase los correspondientes a (por orde) Ciencies Sociales, Comunicación y Humanidaes, Investigación Científica y Técnica, Lletres y Cooperación Internacional. Los Premios Príncipe d'Asturies de los Deportes y de la Concordia fallaránse'l próximu mes de setiembre.
  
Caún de los Premios Príncipe d'Asturies, concedíos la primer vez en 1981, ta dotáu con 50.000 euros, la escultura creada y donada espresamente por Joan Miró pa estos galardones, un diploma y una insinia acreditativos. Los galardones van entregase na seronda n'Uviéu, nun solemne actu presidíu pol Príncipe d'Asturies.