El Principáu pon ochobre como fecha pa rematar les tresferencies

El conseyeru d'Infraestructures, González Buendía, señaló la necesidá d'entainar l'alcuerdu de xestión de los Picos d'Europa, pa llegar a ochobre con tol procesu rematáu.

Coles mesmes, señaló que de cara a les tresferencies tendríase en cuenta les inversiones del 2009, que fueron "buenes", y non les del 2010, que fueron "muncho peores".
  
Nesti sen, indicó a los periodistes, enantes de la inauguración de la Feria del Día Marítimu Européu en Llaboral Centru d'Arte y Creación Industrial, que tán pendientes de la convocatoria d'una xunta que se va a celebrar llueu, pa comunicar "la posición unánime de les tres comunidaes", en referencia a Asturies, Cantabria y Castiella y Lleón. A partir d'esi momentu, convocaríense les comisiones de tresferencies, una por autonomía.
  
Buendía esclarió que, una vez rematáu'l procesu, siguirá xestionándose'l parque como hasta agora, puesto que'l fechu de que nun se produxeren les tresferencies nun supón que sufriere "algún tipu de parón nin nada asemeyao".
  
El conseyeru indicó que la xestión desarrollaráse de manera satisfactoria y apuntó que siempre dixeron que nun queríen facer les tresferencies con priesa pa poder faer les coses bien. Ye más, destacó qu'hasta'l retrasu benefició al Principáu al facese'l cómputu cola referencia del 2009, que foi un añu buenu.