Areces anuncia un conveniu de sofitu a les investigaciones d’El Sidrón

El Presidente del Principáu, Álvarez Areces, anunció la firma d'un conveniu pa fomentar la investigación nes escavaciones n'El Sidrón, pol periodu máximu llegal de cinco años.

Areces caltuvo esta mañana na sede de Presidencia d’Uviéu, un alcuentru col equipu d'investigadores que trabayen dende va una década nel yacimientu d'El Sidrón (Piloña).

A la xunta asistieron tamién, el director del equipu d'investigación encargáu del yacimientu arqueolóxicu y Profesor Titular de Prehistoria de la Universidá d'Uviéu, Marcu de la Rasilla; y otros dos investigadores del proyeutu, el paleoantropólogu, Antonio Roses, y el paleoxenetista, Carles Lalueza-Fox. Amás de la Conseyera de Cultura y Turismu, Mercedes Álvarez González, y el Direutor Xeneral de Patrimoniu Cultural y Turismu, José Luis Vega Álvarez.

Areces tamién anunció que'l Principáu va implicase nel llabor divulgativu cola construcción d'un Centru d'Interpretación sobre la materia, la Casa de los Neandertales que va crease na localidá piloñesa de Villamayor.

Sicasí, Areces matizó que “nun tenemos por qué esperar a tener físicamente un edificiu como Centru d'Interpretación”. Nesi aspeutu, el Presidente resaltó que'l Gobiernu va sofitar la realización d'una esposición itinerante con material del yacimientu.