Los ecoloxistes acusen al Principáu del desaniciu del gallu montés

Doce grupos consideren que’l censu del gallu montés amuesa’l fracasu del Principáu cola especie, col alarmante descensu en tol país y el so desaniciu na zona Centro-Oriental.

Los ecoloxistes afirmen que'l Principáu llevó a cabu una política de xestión contraria a la que suxuren los conocimientos disponibles; “siguierón facilitando l'apertura de pistes y carreteres, la minería a cielu abiertu, los roces, la repoblación con especies foranes y les quemes”.

Critiquen tamién que se destinaren grandes cantidaes de dineru a la construcción d'un centru de cría en cautividá y d'otru d'interpretación “que nun sirvió pa nada”, mientres ponen torgues al desenvolvimientu de proyeutos d'investigación. Amás, recuerden que sigue ensin redactase'l Plan de Recuperación del Gallu Montés qu'esixe la llei, yá que ye una especie catalogada en peligru d’estinción.

Los ecoloxistes señalen que tendrién qu’algamase los oxetivos de recolonización d'árees abandonaes y evitar que siga'l procesu de fragmentación y deterioru d'estáu de caltenimientu de la especie, la eliminación progresiva de les amenaces pente medies de una meyora de la xestión del hábitat y la busca de fórmules que compatibilicen los intereses de diversos sectores colos requerimientos ecolóxicos de la especie.

Recuerden qu’una de les causes que xeneraron l’actual situación del gallu montés ye l'amenorgamientu y fragmentación del so hábitat, “cola tolerancia del Principáu que dexó'l desenvolvimientu d'actividaes bien agresives, como cientos de pistes abiertes que dexen el transito de toa clase de vehículos y les molesties que xeneren, les mines y canteres, les estaciones d'esquí...”. Tamién culpen a les quemes forestales, “nun se ta faciendo tol esfuerzu na prevención”, el futivismu y la competencia pol alimentu con otres especies.

“Ye precisu un plan de futuru real consensuáu con toos, non podemos quedar n'iniciatives pa la galería mientres vemos como la especie sume pa siempres de los nuesos montes”, apunten pa finar.