Presenten un manifiestu por una candidatura soberanista en Cataluña

Unes sesenta personalidaes de tolos ámbitos de la sociedá catalana presentaron un manifiestu por una única candidatura soberanista pa priorizar l'oxetivu de la independencia.

Los promotores del manifiestu son l'ex presidente d'ERC y del Parlament, Heribert Barrera; l'ex conseyeru de Xusticia Agustí Bassols (UDC); l'ex alcalde Badalona y ex diputáu del PSC, Joan Blanch; el ciruxanu y escritor Moisès Broggi; y el ciruxanu Oriol Domènec.

Mientres l'actu fixeron un llamáu a tol independentismu catalán pa la celebración d'una conferencia unitaria pola independencia. Bassols espresó que la conferencia pue convocase con relativa facilidá y sería un pasu p'alantre.
  
Blanch afirmó que ye bien difícil algamar l'oxetivu que prevé'l manifiestu y qu'hai que recoyer firmes y llegar a toes partes porque "hai xente qu'ha saber qu'ellos son los que paguen la non independencia".
  
Blanch refirióse tamién a la estructura de los partíos catalanes y afirmó que "nun lleva a nenguna parte" y que ye un desastre. Domènec espresó que si sal más d'una candidatura soberanista nes próximes elecciones catalanes "perdemos toos".
  
El manifiestu espresa que l'estancamientu nel autonomismu "significaría pa la nación catalana l'aceptación d'una muerte dulce" y nun tien nenguna esperanza nuna fórmula de tipu federal porque "prácticamente nun hai federalistes n'España".
  
Ente los más de 60 que roblaron el manifiestu hasta güei apaecen numberosos escritores como Victor Alexandre, Salvador Cardús, Jordi Coca, Patricia Gabancho, Raimon Panikkar, Màrius Ferrucha, Francecs Vicens y Josep Maria Terricabras. Tamién tán ente los firmantes el periodista Miquel Calçada, el pintor Joan Pere Viladecans y l'actriz Montserrat Carulla.
  
Amás sumáronse, ente otros, l'abogáu, historiador y políticu de CDC Josep Maria Ainaud, el filólogu y ex rector de la Universidá de Barcelona (UB) Antoni Maria Badia; el tamién filólogu y presidente d'honor d'Unesco en Catalunya, Félix Martí; l'ex presidente del FCB Agustí Montal; l'ex presidente de Òmnium Cultural y miembru d'Unesco Catalunya Jordi Porta; el director de la orquesta sinfónica Antoni Ros; el catedráticu eméritu d'economía de la UB Jacint Ros; el tamién catedráticu d'estética de la EAB y fundador del Institut for the Humanities; la historiadora y política Eva Ferrucha; el filólogu Joan Solà; l'historiador Josep Maria Solé; y el sociollingüista y fundador de Sobirania i Progrès, Miquel Strubell.