Trabayadores de Venturo XXI zárrense nes instalaciones

Dellos trabayadores de Venturo XXI entamaron un zarru nes instalaciones "como midida de presión ente la rocea y la falta de respuestes de la dirección a los emplegaos".

El secretariu del comité d'empresa, Miguel Fernández, manifestó que la decisión d'entamar l'enzarru, que pel momentu ye indefiníu, tomóla l'asamblea de trabayadores aconceyada a les 12.00 d'esti mediudía. "Trátase d'un enzarru pacíficu, nun hai nenguna intención d'estropiar les instalaciones, simplemente queremos que se mos esplique qué va pasar, porque'l tiempu cuerre na nuesa contra", indicó Fernández.   
 
La firma cartográfica, en concursu d'acreedores, plantegó un ERE d'estinción d'emplegu pa bona parte de los emplegaos y l'amenaza de zarru va cobrando fuerza. Nesti contestu, trabayadores consideren que la única solución ye inyectar capital --bien públicu o bien al traviés d'un nuevu sociu priváu-- primero que se consume'l procesu de lliquidación de la compañía.