Miles de persones manifiéstense pol derechu a vivir en gallegu

Miles de persones partieron de l'Alameda compostelana pa reivindicar "el derechu a vivir en gallegu", convocaes por Queremos Galego, con motivu del Día das Lletres Galegas.

Nun ambiente festivu al son de tambores y metanes conseñes como "En Galiza, en galego" o "as aulas da Galiza en galego", la manifestación entamó encabezada por una pancarta na que podía lleese "O galego, a forza do noso amor", una frase d'Uxío Novoneyra, l'escritor al que nesta ocasión se-y dedica'l Día das Lletres Galegas.

La pancarta principal va sostenida, ente otros, pol voceru de la plataforma convocante, Carlos Callón; el secretariu xeral de la CIG, Suso Seixo; el diputáu nacionalista Bieito Lobeira; y la coordinadora nacional d'EU-IU, Iolanda Díaz.
  
Unos pasos más detrás, pero próximos a la cabecera de la manifestación, que va acabar na Praza del Obradoiro, van los líderes de los grupos de la oposición, el voceru nacional del BNG, Guillerme Vázquez, y el secretariu xeral del PSdeG, Manuel 'Pachi' Vázquez, xunto con otros representantes socialistes como'l presidente de la Fegamp, Carlos Fernández.
  
Al entamu de la manifestación, Carlos Callón resaltó qu'esiste "un 20% d'analfabetos funcionales en gallegu", datu que sorrayó qu'evidencia la necesidá d'articular midíes. Por ello, apeló a la Xunta pa que "sienta la voz de la sociedá" y entame midíes que potencien la llingua propia "históricamente desfavorecida" pa garantizar "la igualdá real" col castellán.
  
Amás, el tamién presidente de la Mesa pola Normalización Lingüística sorrayó qu'informes xurídicos como'l dictame del Consello Consultivu indiquen que'l decretu del plurilingüismu que pretende aprobar l'Executivu gallegu ye "illegal y inconstitucional". Asina, contrapunxo les alegaciones d'esti órganu qu'asitien el proyectu "fuera del ordenamientu xurídicu", coles que plantegara contra'l decretu del anterior Gobiernu bipartitu, que dixo que se referíen "a cuestiones menores".