Queremos Galego prevé una manifestación histórica

Queremos Galego prevé una participación hestórica na manifestación que convocó mañana con motivu del Día das Letras Galegas y que va xunir llingua con economía.

La manifestación, que va cuntar cola presencia de la executiva del PSdeG, va partir a les 12.00 hores de l'Alameda de la capital gallega hasta la Praza do Obradoiro, onde va tener llugar un actu central. Mientres la marcha va haber dos cartelos distintos, nos que van amosar un bollu de pan y un corazón, amosando que se quier l'idioma, pero tamién los recursos materiales del territoriu.

Queremos Galego ye una plataforma de más de 500 entidaes culturales, sociales y vecinales, asemeyada al asturianu Conseyu Abiertu pola Oficialidá. El voceru de la plataforma, Carlos Callón, reivindicó la importancia de dar respuesta a la política de la Xunta presidida por Alberto Núñez Feijóo. "Un presidente que nun cree nel país, nin na so economía, la so llingua y la so cultura", llamentó.

Callón venceyó tamién los procesos de recuperación llingüística n'otres comunidaes autónomes con un progresivu "fortalecimientu económicu", p'argumentar que la situación del idioma ye "un termómetru" del desenvolvimientu xeneral d'un territoriu.
 
Callón esixó a Feijóo que cumpla cola llexislación vixente y que "dexe de malgastar el dineru público p'atacar" al gallegu, n'alusión a una posible campaña de promoción del nuevu decretu del gallegu nel sistema educativu y a la que se destinaría cerca d'un millón d'euros.

"Un insultu pa les families que sufren a la crisis económica", aseveró Callón, pa depués recordar que se trata d'una partida que va promocionar una norma refugada polos sindicatos y pol Consello Escolar de Galicia".