Lluz verde a les imaxes repulsives de los efeutos del tabacu

El Gobiernu aprobó que los caxetos de tabacu lleven una imaxe sobre los efeutos del tabacu, con semeyes de cadabres, tumores de pulmón y pescuezu y dentadures estropiaes.

El Real Decretu aprobáu pol Conseyu de Ministros, establez qu'a partir d'esti mes y con una prórroga "de 12 a 24 meses", van tener qu'usase una de les 14 imaxes escoyíes por Sanidá del catálogu aprobáu pola Comisión Europea en mayu del 2006.

Esta nueva norma, que tamién regula los conteníos máximos de nicotina, alquitrán y monóxidu de carbonu de los pitos, prevé una prórroga pa l'adaptación de los envases a los nuevos requisitos de comercialización "en previsión del costu que puea suponer pa la industria tabaquera'l cambiu del Etiquetáu".
 
Les imaxes van dir acompañaes de testos d'alvertencia, como que fumar "acorta la vida", "atranca les arteries y provoca cardiopatíes y accidentes cardiovasculares", "provoca cáncer mortal de pulmón", "pue ser causa d'una muerte lenta y dolorosa" o que "el fumu contién bencenu, nitrosamines, formaldehído y cianuru d'hidróxenu".
  
Estes semeyes podrán alteriase pa garantizar l'apaición regular de toles alvertencies nuna cantidá igual d'unidaes d'envasáu. En cualquier casu, les semeyes y los nuevos mensaxes "nun van sustituyir a les alvertencies xenerales, que van siguir figurando nel Etiquetáu, como 'Fumar mata' y 'Fumar perxudica gravemente la so salú y la de los que tán al so alredor'".