Belén Fernandez diz qu’Asturies apuesta pol reciclaxe

La Viceconseyera de Mediu Ambiente diz que’l reciclaxe ye l'apueste medular del modelu de xestión de borrafes, “cola valorización enerxética como solución complementaria”.

Belén Fernández compareció en rueda de prensa acompañada de la xefa de calidá, Mediu Ambiente y Prevención de Riesgos Llaborales de Coxersa, Elena Fernández Martínez, pa esplicar el programa d'actividaes del Día Mundial del Reciclaxe. La tamién Vicepresidenta del Consorciu pa la Xestión de los Residuos Sólides n'Asturies (Coxersa) esplicó que la recoyida selectiva yá algamó en 2009 el 17% del total de la basoria municipal y que va siguir aumentando hasta cerca del 40% nel próximu llustru.

La Viceconseyera de Mediu Ambiente esplicó qu'el modelo de xestión de borrafes col que va cuntar Asturies en 2015 “ye un modelo públicu, eficiente y al serviciu del desenvolvimientu caltenible, onde se van combinar cinco sistemes de tratamientu complementarios: el reciclaxe, el compostaxe, la biometanización, la valorización enerxética y el vertíu d'escories y cenices”

“L'oxetivu ye convertir la recoyida selectiva y el recicláu nel apueste medular del modelu d'Asturies de xestión de borrafes. La valorización enerxética va ser la solución complementaria pa tratar la fracción resto, esencialmente aquelles borrafes que fueren oxetu d'un tratamientu previu”, resaltó.

Fernández apuntó que la recoyida selectiva de toles fracciones de borrafes urbanes (papel y cartón, envases llixeros y de vidriu, chatarres, muebles, materia orgánico, etc.) aumentó un 40% dende esi añu p'asitiase en 2009 nel 17,6% del total de les borrafes urbanes, equivalente a 93.000 tonelaes.

L'oxetivu de Coxersa, señalaron, ye siguir trabayando per este mesmu camín nos próximos cinco años con inversiones que van superar los 90 millones d'euros (plantes de clasificación de basura bruta y de biometanización de la fracción orgánica, finalización de la nueva rede de puntos llimpios, etc.) pa llograr aumentar la recoyida selectiva hasta'l 38,8% en 2015, unes 210.000 tonelaes al añu.

Según detalló Belén Fernández, Asturies ta perriba de la media d'España tocantes a reciclaxe de papel y cartón. Tamién nos envases de vidriu, onde tien particular incidencia el costume de reutilizar les botelles de sidra.