El CXPX suspende a Garzón

El Conseyu Xeneral del Poder Xudicial alcordó por unanimidá suspender al xuez de l'Audiencia Nacional Baltasar Garzón depués d'abrise xuiciu oral contra él nel Supremu

El xuiciu vien por una presunta prevaricación cometida al investigar les desapaiciones del franquismu ensin tener competencia pa ello. El Conseyu actuó contra Garzón n'aplicación del artículu 383 de la Llei Orgánica del Poder Xudicial (LOPJ), qu'obliga a estremar de los sos llabores xurisdiccionales a cualquier xuez o maxistráu cuando se declarare qu'ha procedese contra él por delitos cometíos nel exerciciu de les sos funciones.
  
D'esta manera, el titular del xulgáu Central d'Instrucción númberu 5 vese obligáu a abandonar "de forma automática" l'Audiencia Nacional hasta que nun se resuelvan les tres causes abiertes por prevaricación contra él nel Tribunal Supremu. Amás del asuntu rellacionáu cola Memoria Histórica, Garzón tien pendiente saber si tamién va ser sentáu nel banquín polos cobros que llogró de la Universidá de Nueva York por dirixir unos cursos patrocinaos pol Bancu de Santander; y por una tercer causa que se tramita por intervenir esti maxistráu les comunicaciones de los supuestos cabezaleros de la trama 'Gürtel' colos sos abogaos en prisión.
  
A lo último, l'órganu de gobiernu de los xueces nun valoró'l pidimientu realizáu por Garzón pa declarase en "situación de servicios especiales" col fin d'aceptar una plaza d'asesor de la Fiscalía nel Tribunal Penal Internacional, con sede en La Haya (Holanda), lo qu'evitara la so suspensión mientres, polo menos, los siete meses pa los que solicitó dichu permisu.