Los ecoloxistes piden l’aplicación del reciclaxe frente la incineración

Nel Día Mundial del Reciclaxe, la Coordinadora Ecoloxista fai un llamáu pa dexar de llau la incineradora y apostar por polítiques de reciclaxe, “de les que cada vez tamos más lloñe”.

Los ecoloxistes camienten que n’Asturies nun hai nada que celebrar esti domingu 16 de mayu, Día Mundial del Reciclaxe, yá que “tenemos una media del 9,7% de reciclaxe, frente a otros llugares onde yá consiguen el 30%,  hai conceyos n'España con tases reales del 82%, países d'Europa con tases del 70%, mentanto equí nun llegamos al 10%”.

Recuerden que colos datos na mano de Coxersa, tamos mui lloñe de los datos de reciclaxe marcaos nel Plan Básicu de Xestión de Residuos d’Asturies pal añu 2006. Del mesmu mou, señalen que la incineradora plantegada por Coxersa, “la segunda mayor d’España”, quemaría’l 80% de borrafes urbanes y nun quedaría nada pa reciclar, “si quemen tou como tienen previstu diría contra toles  direutives europees esistentes y contra los criterios de sostenibilidá”.

Los ecoloxistes afirmen que nun se pue dexar que los conceyos, “responsables llegales de la recoyida y tratamientu de les borrafes”, arrenuncien a la so responsabilidá. Tamién s’amuesen partidarios de camudar les tases de recoyida de basures pa incentivar el reciclaxe, “les tases son una ferramienta pa favorecer l'amenorgamientu, equí n'Asturies nun esiste diferencia”.

“Hai que facer un apueste decidíu pola información y sensibilización ambiental como una midida de futuru pa concenciar a la población, pero tamién hai que tomar midíes coercitives pa facer cumplir les ordenances de llimpieza y los decretos que desenvuelven les polítiques de reciclaxe”, apunten pa finar.