La Xunta de Galicia vese "avalada" p'aprobar el decretu del gallegu

El conseyeru d'Educación, Jesús Vázquez Abá, aseguró sentise "avaláu dafechu" pol resultáu electoral y pola sociedá, p'aprobar el decretu del gallegu, "en próximos díes".

Frente a esta actitú del Gobiernu autonómicu, PSdeG y BNG apelaron a llograr que'l Día das Letras Galegas (17 de mayu) seya una fecha pa la defensa de la llingua.
  
Mientres el debate d'una interpelación, el conseyeru calcó en que nun se siente "solu" na so "apuesta pol plurilingüismu", puesto que "son más" los colectivos qu'apoyen a la Xunta que los que s'oponen al decretu. "La nuesa postura ta lexitimada", enfatizó, non sin llamentar nun poder consensuar el testu colos grupos de la oposición, de los que contó que "tán más interesaos n'atacar al Gobiernu que nel gallegu".
  
Tres esto, aconseyó a socialistes y nacionalistes que "escuchen" a la sociedá o, de lo contrario, van siguir "muncho tiempu" na oposición. "Toi convencíu de que, hasta xente que va nes sos llistes, va acabar votando al PP pola so política llingüística", interpretó, en pidiendo a les dos formaciones que se sumen al futuru, "al plurillingüismu".
  
Al conseyeru sumóse'l diputáu del PPdeG Agustín Baamonde, que censuró l'enfotu "d'esaltación llingüística" de PSdeG y BNG y xulgó que "la cercanía" al 17 de mayu "dispara les señardaes de la oposición" sobre "el día de la patria bipartita". Pela so parte, el impulsor de la interpelación, el socialista Guillermo Meijón, espetó a los 'populares' que "el so día de la patria" ye'l 18 de xunetu, n'alusión al golpe d'Estáu franquista.
  
En cuanto al decretu, tanto Meijón como la diputada nacionalista Carmen Adán señalaron la falta de consensu con que va salir alantre y recordaron "el despreciu" que la Xunta brindó al Consello da Cultura Galega (CCG), la Real Academia Galega (RAG), el Consello Escolar de Galicia y dellos sindicatos, colectivos y asociaciones de madres y padres, amás de la Federación Galega de Conceyos y Provincias (Fegamp), pola so oposición.
 
50 cambios afeutaos

Pela so parte, el titular d'Educación aseguró "respetar" les opiniones de tolos colectivos y instituciones y, como prueba, señaló que se ficieron un total de 50 cambios nel testu orixinal del decretu.
  
No que se  refier a ello, retrucó al BNG que "tampoco" escuchó a la RAG cuando dixo que "yera Galicia y non Galiza", nin al académicu Xesús Alonso Montero cuando alertó de riesgu de "afogar al gallegu". Tampoco atendieron, según Vázquez Abad, cuando s'esclaró que l'usu de los idiomes "nun depende de los gobiernos, tal como quieren faer ver los colectivos anti esti gobiernu".
  
Énte esto, Meijón recordó que la Xunta "tendría que retirar el decretu" y el conseyeru "presentar la so dimisión" dempués de que'l Consello Escolar aprobare por mayoría una enmienda a la totalidá. "Esto evidencia la so gran mentira sobre'l consensu, namás pretende imponelu a cualquier preciu", denunció, y repostió: "namás quier aparentar".
  
A lo último, alvirtió a Vázquez Abad de que va tener que siguir el dictame del Consello Consultivo en casu de que s'indique la illegalidá de dellos artículos". "Sinón, lo que va asoceder el 17 de mayu va ser un cuentu chinu comparáu colo que va pasar", amenazó, n'antemanando una "gran movilización" el Día das Letras Galegas.
 
El gallegu "poscritu"

El debate sobre les llingües siguió con otra interpelación que sacó alantre'l parllamentariu nacionalista Bieito Lobeira, qu'acusó al PP de "imponer el castellán dende la so llegada a la Xunta" y de dedicase a recuperar "los prexuicios de que'l gallegu nun val".
  
En denunciando que l'Executivu autonómicu trata de "reproducir los peores esquemes de autoodiu pol so síndrome de Michael Jackson", criticó que'l presidente de la Xunta, Alberto Núñez Feijóo, "llegó al estremu vomitivu de prostituyir la memoria de Castelao al traducilu al castellán".
  
"Nun tienen derechu a tornar el gallegu nun idioma proscritu nel so país", remarcó, y xirando pal vicepresidente de la Cámara, José Manuel Baltar, alvirtió que "nel PP yá nun queden galleguistes, sinón solo arribistes, porque nun tán dispuestos a xugase nin la so nómina" por defender la llingua.
  
Na so vez de réplica, el conseyeru de Presidencia, Alfonso Rueda, criticó'l "tonu bélicu" utilizáu pol nacionalista y reafirmó'l "galleguismu" del PP. "Somos galleguistes, a muncha honra, pero defendemos el derechu a elixir", reivindicó, y mostróse partidariu de "un billingüismu integrador basáu na convivencia y na defensa de la llibertá".
  
Asina, apostó por poner "en marcha midíes en positivo" como "la meyor estratexa" pa la "plena normalización" de la llingua y refugó optar "pola confrontación". En criticando les descalificaciones arramaes por Lobeira, consideró que'l Díes das Letras Galegas sería "una bona fecha" pa que'l so grupu se ponga "cola mayoría" y se puea, d'esta manera, "volver a la sienda de la coesistencia".
 
"Día de combate"
  
Pela so parte, el diputáu del PSdeG Francisco Cerviño llamentó que'l 17 de mayu vuelva tener "un carácter reivindicativu y de combate" porque la sociedá vuelve tener la percepción, como nel franquismu, de "tener que lluchar pol gallegu" porque la Xunta "nun cumple cola so obligación de defendelu".
  
l contrario, según la so opinión, la ciudadanía cuenta que'l Gobiernu autonómicu ta "desmangando" la protección y promoción de la llingua propia y, nesta llinia, previó que'l decretu "va acelerar la muerte del gallegu". "¿Y cómo llamaríamos al que manda tirar el Pórticu de la Gloria?", cuestionó, parafrasiando a Castelao, pa acabar diciendo qu'igual de "bárbaru" ye'l que "destrúi l'idioma", y tachó de "bárbaru" a Feijóo.
  
A lo último, Bieito Lobeira coincidió con Cerviño en que va haber una gran movilización na Alamea de Santiago pa reivindicar la importancia del Día das Letras Galegas y contrapunxo esta manifestación cola que protagonizaron dirixentes del PP "de ganchete" cola líder d'UPyD, Rosa Díez, contra l'anterior decretu.
  
Na so última vez, Alfonso Rueda llamentó que los grupos de la oposición vean el 17 de mayu como una fecha de "combate" y non como "una festividá" pa emponderar a los literatos gallegos. Dirixéndose a los escaños socialistes, llamentó que nun pudieren "lliberase" del Bloque nel ámbitu llingüísticu, porque'l so amor, alvirtió, "nun ye correspondíu".