Cameron ta yá en Downing Street

El nuevu primer ministru británicu, David Cameron, llegó yá a Downing Street pa encarar la so primer xornada al frente del Gobiernu, na que va presidir la primer xunta de Gabinete.

A pesar de qu'ayeri yá visitó cola so muyer, Samantha, la que va ser la so próxima vivienda, si nun hai cambios nos términos del pautu ente'l so Partíu Conservador y el Lliberaldemócrata de Nick Clegg, que va tornar nel númberu dos del nuevu Executivu, a lo último la pareya decidió pernoctar na qu'hasta agora yera la so vivienda, nel barriu londinense de Notting Hill.
  
Sicasí, malpenes 12 hores depués de confirmalo pola Reina nel Palaciu de Buckingham, el nuevu mandatariu ta yá nel númberu 10, dende onde se prevé que dea a conocer la composición definitiva del so Executivu, nel que la tercer fuerza va asumir cinco carteres y hasta 20 puestos de responsabilidá.
  
De momentu, tán confirmaos, amás de Clegg, algunos de los ministerios de mayor pesu, especialmente'l del Tesoru, puesto que calmar a la City énte esti nuevu escenariu políticu yera ún de los primeros retos del Gobiernu. A lo último, George Osborne, a pesar de les especulaciones sobre la so esperiencia pal cargu, va cambiase al númberu 11 y va pasar como'l titular de finances más mozu de la historia.
  
El conservador Liam Fox va asumir Defensa y, pal departamentu d'Esteriores confírmase'l voceru na materia, William Hague, amás d'Osborne, miembru del equipu negociador que la pasada xornada tuvo hasta siete hores concentráu cola delegación lliberaldemócrata pa roblar alcuerdu que, tan solo 24 hores anantes, paecía entornar del llau llaborista.
  
Los plazos oficiales de los próximos díes prevén, de primeres, la constitución oficial del Parllamentu'l próximu 18 de mayu y, una selmana dempués, el Discursu de la Reina nel que se va confirmar a un gabinete que, colos 306 escaños 'tories' y los 57 de los otros, superen de sobra la mayoría absoluta, fixada en 326 siyes. Amás, nos primeros 50 díes de xestión aprobaráse un presupuestu d'emerxencia con un plan concretu p'atacar el déficit.