L'escultor Richard Serra, Príncipe d'Asturies de les Artes 2010

L'escultor estaoxunidense Richard Serra resultó galardonáu col Príncipe d'Asturies de les Artes 2010, según fixo público güei n'Uviéu'l Xuráu encargáu de la so concesión.

Richard Serra ta consideráu ún de los escultores más relevantes de la vanguardia de la segunda metá del sieglu XX pola so innovadora visión al integrar los espacios urbanos al traviés d'una obra que convida a la reflexón.
  
El Xuráu d'esti Premiu convocáu pola Fundación Príncipe d'Asturies -tuvo presidíu por José Lladó y Fernández-Urrutia, y integráu por Mercedes Álvarez, Lourdes Fernández, José Fernández-Velasco, Carlos Fitz-James Stuart Martínez de Irujo, José Luis Garci, Jordi García Candau, Rosina Gómez-Baeza, Emilio Marcos Vallaure, Hans Meinke, Miguel Muñiz, Benín Pendás, Amelia Valcárcel y José Antonio Caicoya (secretariu). Esta candidatura propúnxola Carmen Giménez, comisaria d'Arte del Sieglu XX 'Stephen and Nan Swid' de la Fundación Solomon R. Guggenheim de Nueva York.
  
L'acta del xuráu señala que se decidió concede-y el premiu "pola so audacia pa vertebrar dende la so perspectiva minimalista los espacios humanos más significativos a escala internacional, al traviés d'obres de gran potencia visual que conviden a la reflexón y el plasmu".
  
"Mui vinculáu cola meyor tradición del arte européu a lo llargo de la so trayecutoria, Serra ye un artista polifacéticu qu'espresa la so dimensión universal en formes contundentes y conceptos suxestivos", acaba l'acta.
  
Richard Serra, fíu de padre español, nació en San Franciscu (EEXX) en 1939. Estudió na Universidá de California-Berkeley, onde se graduó en Ciencies y en Lliteratura Inglesa en 1961, y en Yale, onde cursó estudios artísticos hasta 1964. A mediaos de la década de los 60 amplió la so formación en París y en Florencia. Realizó la so primer muestra individual titulada Live Animal Habitat na galería La Salita de Roma. En 1967 empezó a esponer en Nueva York de la mano del galerista Leo Castelli. A parte d'ehí, Serra mostró la so obra nos museos más representativos d'Europa, América y Asia y ta presente nes colecciones públiques y privaes más importantes del mundu.
  
Autor d'obres minimalistas y d'escultures de gran tamañu diseñaes pa llugares concretos, la so técnica sírvese de materiales industriales como'l plomu, l'aceru y el formigón. Los sos primeros trabayos, ente los que s'atopa la so obra 'Cinturones', espuesta nel Guggenheim de Nueva York, consisten nuna serie de montaxes realizaos en neón y cauchu. Ente 1968 y 1969 creó cerca de 100 escultures de plomu, ente les que destaca 'Splashing', una obra que realizó tirando plomu dilíu contra una paré y contra'l suelu pa que'l metal s'estrellare antes de solidificase. En 1981 creó una de les sos escultures más espectaculares, 'Arcu inclináu', pa la Plaza Federal de Nueva York; en 1983, la obra 'Clara-Clara' pa la Plaza de la Concordia de París y en 1990 instaló 'Afangar' n'Islandia.
    
N'España espón la so obra nel Muséu Reina Sofía de Madrid, nel Muséu d'Arte Contemporaneu de Barcelona y nel Guggenheim de Bilbao, onde ta la obra 'La Culiebra'. Esti muséu acueye amás una obra que'l mesmu autor entiende como la más importante de la so carrera, 'La materia del tiempu'. Pese a considerase fundamentalmente escultor, la so estensa producción garra otres disciplines, como la obra gráfica y fílmica. A últimos de la década de los 60 realizó una serie de películes, ente les que destaquen Hand Catching Lead y Hands Tied, ambes de 1968, que se centren na execución repitida y sistemática de trabayos.
  
Doctor honoris causa poles universidaes de Yale, Londres y Pública de Navarra, ente otres, ye Caballeru (1985) y Comendador (2008) de la Orde de les Artes y les Lletres de Francia. Nel 2008 condecoránronlu cola entós acabante crease Orde de les Artes y les Lletres d'España, concedida pol Ministeriu de Cultura. Miembru de l'Academia Americana de les Artes y les Ciencies, ente otres distinciones, recibió l'Aniellu del Emperador de la ciudá alemana de Goslar y el Praemium Imperiale d'Escultura de Xapón, en 1994.
  
Los Premios Príncipe d'Asturies tán destinaos, según el so Reglamentu, a galardonar "el llabor científicu, técnicu, cultural, social y humanu realizáu por persones, equipos de trabayu o instituciones nel ámbitu internacional". Dientro d'esti espíritu, el Premiu Príncipe d'Asturies de les Artes "va concedese a la persona, institución, grupu de persones o d'instituciones que desarrollaren un llabor na Arquitectura, Cinematografía, Danza, Escultura, Música, Pintura y demás espresiones artístiques, que constituya una aportación relevante al patrimoniu cultural de la Humanidá".
  
Nesta edición acudíen un total de 29 candidatures, procedentes d'Arxentina, Australia, Austria, Cuba, Estaos Xuníos, Estonia, Francia, Grecia, Italia, Panamá, Portugal, Reinu Xuníu, Tailandia y España.