Preséntase n’Uviéu un documental sobre’l filandón

Güei, a les 20 hores, el Club de Prensa Asturiana d’Uviéu, va acoyer la presentación de ‘Filandón en Xedré’, documental de más de dos hores que recrea esta institución tradicional.

‘Filandón en Xedré’ ye un trabayu audiovisual del escritor y estudiosu de la cultura asturiana Naciu i Riguillón. Al traviés de 150 minutos, el documental recrea un filandón tradicional. El trabayu ta dixebráu en 14 capítulos que posibiliten la tresmisión del documental por televisión ya Internet.
 
La obra consta de dos DVDs d’una hora y cuartu de grabación caún que tán subtitulaos en tres idiomes; nel asturianu orixinal, en castellán y n’inglés. El trabayu audiovisual cuntó col sofitu de la Conseyería de Cultura y del Conceyu de Cangas del Narcea .
 
Nel actu de presentación de güei n’Uviéu, van participar la Direutora Xeneral de Política Llingüística, Consuelo Vega; l'alcalde de Cangas, José Manuel Martínez; l'académicu de la llingua, Roberto González Quevedo; y la escritora María Esther García.
 
El filandón ye una xuntanza que se fai peles nueches al finar la cena, na que se cunten en voz alta cuentos al empar que se trabaya en dalguna llabor manual (xeneralmente testil). Esta xuntanza avezaba ser alredor del llar. El filandón sigue vivo en dalgunes zones de Galicia, de Lleón y nel nuesu país.