Fai! celebra un conciertu pa reivindicar el 25 de mayu

Fai! quier conmemorar el 25 de mayu cola II Folixa Nacional ‘Asturies enxamás vencida’, conciertu onde actuarán Mallacán, La Tarrancha, Arma X, Galán y Da Robotz.

La organización de mocedá independentista presentó güei en rueda de prensa’l conciertu, que va celebrase’l próximu sábadu 22 de mayu, a les 20 hores nes dependencias de la Casa Sindical de Xixón.

Fai! quier asina facer alcordanza de la “dignidá” del 25 de mayu, “día que foi hitóricamente celebráu como día d’Asturies enantes de la Transición”, en cuenta del 8 de setiembre, “día de la Santina”.

L’agrupación soberanista quier algamar la máxima representatividá nel actu del texíu social y políticu asturianu, “lo que nós consideramos un llogru considerable na situación de total indefensión na que s’atopen munchen de les reivindicaciones que compartimos munchos coleutivos y sensibilidaesde la esquierda asturiana”.

Amás d’un conciertu, dende Fai! quieren convertir la cita nun actu políticu nel que’l micrófonu tará abiertu “a la llibre espresión de cualesquier persona o coleutivu”. Pel momentu, yá tienen confirmada la presencia de delles organizaciones que van montar puestos d’información, amás de tomar la pallabra nel actu.

Nel conciertu van participar Mallacán, grupu cimeru del rock n’aragonés qu’esti añu va dar una xira per Xapón y tocar nel Fuji Rock; La Tarrancha, grupu de ska-reggae asturianu que ta acabantes d’asoleyar ‘Ö33’; Arma X, raperu de la Cuenca qu’espublizó va poco ’25 otoños’; Galán, otru raperu, nesi casu de Tresona, que tien nes tiendes rl discu ‘Barriendo pa fuera’; y pa finar Da Robotz, nome tres el que ta Xel Díaz, músicu uvieín que fai composiciones lletróniques averaes al mundu del folk.

El conciertu tendrá un preciu de 8 euros. Mientres que garrando la entrada anticipada, será de 6 euros. En Xixón, les entraes tará disponibles nel local de Sestaferia y n’El Baruku; n’Uviéu en La Casa Posafuelles y L’arcu la vieya; n’Avilés nel Llar d’Andecha; en Mieres en L’Habana y L’Abellugu; y en Posada de Llanera n’El Ñeru.