Libroviedo tamién ye Llibruviéu

La feria Libroviedo, asitiada nel Paséu de los Álamos, va acoyer esta selmana tres presentaciones de llibros n’asturianu que foron premiaos en dellos certamenes de  lliteratura infantil.

Mañana, miércoles 12 de mayu, a partir de les 13 hores, ye la presentación de dos volúmenes, que foron premiaos con accésits nel II Premiu Asturnews de Lliteratura Infantil y Xuvenil. Los volúmenes espublizaos agora son ‘Unos cuentos de muerte’, d’Abel Martínez González; y ‘Febreru, 29’ de Xurde Fernández y Marián García.

Na presentación van tar presentes los autores, el director d’Asturnews, Próspero Morán, y el secretariu del Xuráu qu’otorgó’l premiu, Inaciu Galán. La obra asoléyala Asturnews col sofitu de la Conseyería de Cultura d’Asturies y la collaboración de la editorial La Cruz de Grau.

Mientres que’l xueves ye la presentación del llibru 'Olaya n'África' d'Helena Trexu Fombella, premiu de l'Academia de la LLingua Asturiana de 'Llectures pa rapazos 2008', editáu pola propia institución. La cita ye’l xueves 13 de mayu en Libroviedo a les 18.00 hores. Presentará Esther García López, académica correspondiente y autora de dellos llibros pa la mocedá, amás de profesora hasta va bien poco.

Estos dos actos, sumaos a la presentación de ‘Colección d’identidaes’ de Xuan Bello, el pasáu 9 de mayu, y ‘Rockmería’ de Xune Elipe, el llunes 10, son los únicos llibros n’asturianu qu’acueye’l certame ente los más de 50 actos de la Feria del Llibru de la capital asturianu.