El canon dixital español ye illegal

L'abogada xeneral del Tribunal de Xusticia de la Xunión Europea dictaminó que'l canon dixital que s'aplica n'España ye illegal porque s'impón indiscriminadamente.

"Un sistema nacional que prevé l'aplicación d'un canon por copia privada a tolos equipos, aparatos y materiales de reproducción dixital de forma indiscriminada (como pasa n'España) nun ye compatible" cola normativa comunitaria, afirma'l dictame de Verica Trstenjak.
  
L'abogada xeneral precisa que, p'adautase a la normativa comunitaria, esti tipu de tasa recaudada a favor d'autores, artistes y productores, namás ha aplicase a los equipos y materiales de reproducción dixital que presumiblemente vayan destinase a la realización de copies privaes. Y en nengún casu pue cobrase indiscriminadamente a empreses y profesionales que claramente merquen los aparatos y soportes materiales pa otres finalidaes ayenes a la copia privada.
  
Les conclusiones refiérense al pleitu qu'enfrenta a la Sociedá Xeneral d'Autores (SGAE) cola empresa Padawan, que comercializa dispositivos d'almacenamientu electrónicu, ente otros CD-R, CD-RW, DVD-R y aparatos de MP3. La SGAE reclamó a Padawan el pagu d'una compensación a tantu alzáu por copia privada por importe de 16.759,25 euros correspondiente a los dispositivos d'almacenamientu comercializaos pola firma ente setiembre del 2002 y setiembre del 2004.
  
La lLexislación española permite la reproducción pa usu priváu, ensin autorización del autor, d'obres yá publicaes. Y establez una retribución a tantu alzáu a favor de los titulares de derechos, que grava los equipos, aparatos y materiales de reproducción dixital indiscriminadamente con un canon por copia privada. Los fabricantes, importadores o distribuidores han abonar dichu canon a les entidaes de xestión de los derechos de propiedá intelectual.
  
El casu acabó énte l'Audiencia Provincial de Barcelona, que preguntó al Tribunal de Xusticia de la UE si'l sistema de gravame español ye conforme cola normativa. L'Audiencia señaló que de la respuesta del TXE depende'l derechu de la SGAE a reclamar la compensación que correspondería por tolos dispositivos d'almacenamientu comercializaos por Padawan o namás sobre aquéllos que presumiblemente se destinaren a la copia privada.
  
Nel so dictame d'esti martes, l'abogada xeneral del TUE destaca que "ha esistir una relación bien estrecha ente l'usu del derechu y la correspondiente compensación económica por copia privada".
  
Poro, el canon dixital namás s'adauta a la lexislación comunitaria si s'aplica namás a "equipos, aparatos y materiales" que "vayan destinase presumiblemente a la realización de copies privaes".
  
Pero resulta illegal si, como nel casu español, "aplícase de manera indiscriminada" a "empreses y profesionales que, según muestra la práctica, compren los aparatos y soportes de reproducción dixital pa fines ayenos a la copia privada".
  
Les conclusiones de l'abogada xeneral nun vinculen al Tribunal de Xusticia, anque ésti sígueles na mayoría de los casos. La so función consiste en proponer, con absoluta independencia, una solución  xurídica al asuntu del que s'ocupa. Los xueces del TxE empiecen agora los sos deliberaciones sobre esti asuntu y la sentencia va dictase nun momentu posterior.