Areces asegura que toos tendrán que facer un esfuerzu

El presidente del Principáu, Álvarez Areces, señaló güei en Xixón, qu'Asturies tendrá de facer "un esfuerzu complementariu" pa contribuyir a la reducción del déficit públicu.

Areces recordó que nun tamos n'época de bonanza polo que va haber qu'adaptar el gastu a los recursos disponibles. "Toos sin esceición tenemos que facer un esfuerzu", dixo con alusión a les Conseyeríes que yá alertaron que nun puen executar más rebaxes.
  
Coles mesmes, depués d'un alcuentru colos deportistes asturianos esponsorizaos pol Principáu en Llaboral Ciudá de la Cultura, el xefe del Executivu apostó por basase na eficiencia a la de facer sacrificios, esto ye, "gastar menos, pero sin perder la calidá o eliminar gastos que nun son sustantivos". El Presidente remarcó que yá nel 2011 va haber que reconducir a un porcentaxe del seis por cientu del PIB el déficit.
  
Y anque apuntó que tovía nun se pue precisar cómo va afectar na comunidá autónoma, indicó que lóxicamente va facelo, puesto que toos tienen de contribuyir al esfuerzu qu'España tien que facer p'adaptar el déficit públicu a les llendes acordaes.
  
Areces destacó tamién la reacción positiva" de la Bolsa, "con una subida espectacular" tres l'anunciu de les midíes acordaes nel marcu de la UE. Si toos son coherentes coles midíes podrá encarase la crisis con más solvencia y augurió que la situación "va estabilizase", na so opinión.
  
Amás, llamentó que se comprare España "inxustamente" con Grecia y otros países con más dificultaes, y calcó en que tenemos una solvencia financiera y una deuda global inferior a la d'otros estaos miembros. Sicasí, reconoció que'l puntu débil ye'l déficit públicu, que va ser necesario reconducir al trés por cientu en términos de PIB nel añu 2013. Pa ello, aseguró qu'hai que facer "un gran esfuerzu", al que tendrán de contribuyir toles alministraciones.
  
Tamién aludió a la intervención que va tener el presidente del Estáu, José Luis Rodríguez Zapatero, onde va anunciar les midíes a adoptar y añadió que probablemente va pidir la collaboración de les comunidaes autónomes.
 
Posibles obres afeutaes
 
No referente a la repercusión n'Asturies del recorte del Gobiernu Central, apostó por un equilibriu ente caltener les perspectives d'una economía que tien que siguir creando empléu y completar les infraestructures esenciales.
  
Nesti sen, apeló a les declaraciones del ministru de Fomentu, José Blanco, sobre que les infraestructures ferroviaries y aquelles grandes que se tán executando n'Asturies y que tienen compromisos contractuales coles empreses nun diben tar afectaes pola crisis.
  
Por esti motivu, señaló que nun sería lóxico que l'AVE Madrid-Asturies, con última parada en Xixón, se vea afectáu. Sicasí, alvirtió que va haber otros sitios y llugares nos que va haber qu'actuar y añadió que tendrá qu'analizase "depués de conocer l'horizonte global".
  
A esti respeuto, recordó que se creó un grupu de trabayu nel Conseyu de Política Fiscal y Financiera que tien qu'acabar nel mes de xunetu los sos trabayos, a lo qu'unió la collaboración d'Asturies pero siempre dende un marcu de flexibilidá. Areces apostó por un trabayu tresversal y non d'arriba abaxo, no referente al Estáu y les comunidaes autónomes pa reconducir el déficit. Pese a too, dixo confiar en que nenguna de les grandes infraestructures asturianes en marcha se vea afectada porque son sustanciales p'Asturies y la so economía, amás de tar marcaes por plazos contractuales prácticamente.