Un diariu suecu visita’l país p'amosar la gastronomía

‘Svenska Dagbladet’ ye'l segundu diariu de Suecia y tien a dos periodistes n’Asturies pa facer tres reportaxes sobre la gastronomia y la cultura agroalimentaria asturiana.

La Sociedá Rexonal de Turismu en collaboración cola Oficina Española de Turismu n'Estocolmu, programó, dientro del plan d'acciones de promoción del Turismu Gastronómicu, la publicación de dellos reportaxes sobre gastronomía asturiana nel diariu estatal suecu ‘Svenska Dagbladet’.

Pa ello, el periodista Lars Collin y el fotógrafu Mauro Rongione empezaron un percorríu de cinco díes de duración por Asturies. A lo llargo la selmana, dambos van tener la oportunidá de ver la bayura gastronómica de la nuesa tierra y participar en delles actividaes pa afondar na cultura asturiana venceyada a la producción de productos agroalimentarios.

Asina, ta previstu que participen en dos de los talleres gastronómicos “Saboreando el Paraiso” qu'entama'l Centru de Formación Agroalimentaria de Gozón, o que visiten empreses de distribución y producción agroalimentaria, como ye'l casu de COASA o la quesería Redes. Diches actividaes van compatibilizase con un ampliu programa de visites ente les que s'inclúi un día nel Transcantábricu o percorríos polos principales recursos turísticos y culturales d'Uviéu y Xixón.

Los resultaos d'esti programa de viaxes podrán vese antes del branu cola publicación de tres reportaxes nel diariu suecu ‘Svenska Dagbladet’, que con 350.000 llectores diarios, ye'l segundu diariu suecu más lleíu.