Denuncien el proyeutu de talar 11 hectárees de Munieḷḷos

La Coordinadora Ecoloxista d’Asturies treslladó al Principáu la so oposición al proyeutu d'un propietariu de talar 11,44 hectárees de la Reserva Natural Integral de Munieḷḷos.

Afirmen que quieren salvaguardar la integridá d'esti espaciu protexíu con motivu del trámite de suxerencies de la xestión forestal de Villieḷḷa en Cangas. Esti riesgu surde d'una solicitú de los  Planes d'esplotación forestal de finques asitaes na Villieḷḷa y los Moracales/Solauteiro, nel  conceyu de Cangas.

Los ecoloxistes afirmen que’l caltenimientu d'estos montes por llei, nun permite valtar árboles centenarios (castañales y carbayos), yá qu’afeutaría a la reserva Integral y a los valores que llevaron a la so declaración como figura de máxima protección mediu ambiental na llexislación asturiana.

Tamién soliciten que’l Principáu merque estes finques, “más teniendo en cuenta que'l preciu alcanzáu poles finques ye d'un costu dafechu asumible per parte de l'Alministración (2.444,61 euros)”.  

Al empar, piden el treslláu a los Servicios Xurídicos del Principáu y a la Fiscalía de la documentación apurrida sobre la supuesta titularidá de les finques, sobre lo referente al contratu de compra-venta y a l'acta de protocolización de la finca los Moracales/Solauteiro, “por si d'ello pudiérase desprender dalgún tipu d'apropiación indebida de terrenoos públicos propiedá del Principáu”..

Hai que recordar que'l monte de Munieḷḷos ye l'espaciu asturianu que tien mas figures de protección. Los ecoloxistes afiten l'altu grau de caltenimientu de los montes, que lo convierten nun llugar d'especial valor pa la fauna, por tar presentes la mayor parte de les especies que pueblen el monte cantábricu, “por eso ye inaceptable que s'acepte baltar una parte tan singular d'espaciu protexíu por un particular”.