El Día d'Asturies nel Esterior va celebrase en Menorca

Mahón, capital de Menorca, va ser la localidá que va acoyer los díes 9 y 10 de setiembre los actos del Día d'Asturies nel Esterior, según anunció l’Axencia Asturiana d’Emigración.

Asina lo anunció esta mañana la Directora de l'Axencia, Begoña Serrano, nel intre de la so comparecencia na Comisión de Xunta Xeneral pa informar sobre'l trabayu que vien desenvolviendo dende'l so nomamientu.

Esta celebración va tener llugar los díes 9 y 10 de setiembre, coincidiendo amás col zarru de les fiestes patronales d'esta localidá menorquina. Nella, van tomar parte, amás del Centru Asturianu de Menorca, representantes institucionales de los Gobiernos asturiano y balear, asina como’l Conseyu Insular de Menorca y del Conceyu de Mahón.

El criteriu principal que s'aplica pa escoyer el llugar onde se celebra'l Día d'Asturies nel Esterior ye por rotación ente los distintos centros asturianos esistentes, de tal forma que se vaya alternando un añu n'España, otru nel restu d'Europa y otru n'América.

La eleición de Menorca como sede del Día d'Asturies nel Esterior en 2010 parte d'una petición del Centru Asturianu allugáu na islla. Supón amás una reconocencia al trabayu que vienen realizando los sos miembros, con numberoses actividaes que s'integraron perfectamente na vida social y cultural del llugar d'adopción.

L'añu pasáu estos actos celebráronse en Chile. Dende'l so institucionalización, fueron tamién sede del Día d'Asturies nel Esterior los centros asturianos de Madrid, Bonos Aires, Bruxeles, A Coruña y Laussane..  

Convocatoria de subvenciones

Begoña Serrano aprovechó la so comparecencia na Xunta pa esplicar la convocatoria de les ayudes individuales pa emigrantes asturianos y la destinada a comunidaes asturianes con reconocencia d'asturianía.

Dotada con 450.000 euros, la convocatoria d'ayudes individuales regula la concesión de subvenciones económiques directes y de calter social y asistencial, pa los asturianos y descendientes residentes n'América Llatina, América del Sur, América Central, Países del Mar del Caribe y Méxicu, que s'atopen en situación de necesidá.

Como novedá, destacó qu'anguaño'l Principáu estendió'l Serviciu d'Atención Social p'asturianos nel esterior a Uruguai y Brasil. Esta iniciativa, qu'empezó desenvolviéndose n'Arxentina, Venezuela y Cuba, consiste nel treslláu d'una trabayadora social de l'Axencia Asturiana d'Emigración.

A la convocatoria de subvenciones pa la realización d'actividaes nos centros asturianos con reconocencia d'asturianía destinen un total de 730.700 euros y el plazu de presentación de solicitudes va rematar el próximu 13 d'esti mes

L'oxetu de la convocatoria ye sofitar la organización d'actividaes d'impulsu y espardimientu de la cultura asturiana nos Centros Asturianos, asina como collaborar por que puedan siguir funcionando y desempeñando’l trabayu pa caltener ya intensificar los sos venceyos con Asturies.

A lo último, la Directora de l'Axencia Asturiana d'Emigración informó de que'l Gobiernu del Principáu habilitó 20.000 euros (unos 13.600.000 pesos chilenos), p'ayudar a la población emigrante asturiana en Chile que se vio afeutada con perdes materiales de resultes del terremotu.