Brazos nuevos que garren les pancartes

5.000 persones y l’orbayu participaron na manifestación qu’ayeri, Día de les Lletres, percorrió la cai Uria, dende la Estación del Norte al Campoamor, pa esixir la oficialidá.

Abríen el cortexu una banderona d’Asturies y unes 50 pandereteres qu’entonaron mientres tol percorríu’l ‘Ramu del Día de les Lletres’, dalgunes colos sos neños a la espalda. Después, portada por dellos militantes de la Xunta pola Defensa de la Llingua, una pancarta col lema de la convocatoria ‘L’asturianu llingua oficial’, siguida pola de la Xunta Moza, onde se lleía ‘Oficialidá; la mocedá en llucha pola llingua asturiana’.

Tres d’elles, otros diez militantes llevando caún una lletra de la pallabra ‘oficialidá’. Llueu, otres 5.000 persones, según la organización, y les pancartas de Suatea, IU-Los Verdes-Bloque por Asturies, UNA, Xeira, Darréu y PAS. Ente elles, políticos como Roberto Colunga, Rafa Palacios, Xuan Xosé Sanchéz Vicente o Faustino Zapico.

Llegaos a les puertes del Campoamor, llugar que diba agospiar l’actu académicu, llegó’l turnu pal comunicáu de la Xunta pola Defensa de la Llingua, del que fixo llectura’l militante de la organización Miguel Monteavaro.

Nel mesmu, recordóse qu’a a pesar de los años de llucha polos derechos y la dignidá nun se pue parar d’esixir la oficialidá, “habrálos que piensen que yá son munchos años, que se desanimen, que cansen, pero tenemos la suerte de qu’hai xente que nun se da por vencida, que se xunta con más xente nuevo con ganes de trabayar. Esa ye la suerte del asturianu, que siempre lleguen brazos nuevos que garren les pancartas, que glayen con ilusión lo qu’otros lleven venti o trenta años reclamando”.

 “Lo poco qu’hai arrampuñemoslo nós de los partíos que siempre vieron los derechos pa la nuestra llingua como un peligru pa los intereses d’ellos, porque pa les cúpules d’esos partíos los avances son renuncies”, afirmaron dende la Xunta.

Punxeron como exemplu’l casu de la Escuela de Maxisteriu, “onde’l trabayu de movilización foi quien a dar la vuelta a los argumentos y les intenciones de los que siguen intentando dexar al asturianu fuera de los estudios reglaos, escaeciendo si fai falta tolos mandaos llegales”.

Dende la organización pidieron un movimientu unitaríu organizáu y con apoyos de tol que sienta amor pola llingua, “la ciudadanía yá nun tolera que los encargaos de servilos-yos pongan nos llabios mentires pa xustificar la mediocridá y los intereses colos que traicionen los derechos ciudadanos y el futuru del idioma”.

La Xunta recordó como nos últimos meses los derechos fundamentales de los falantes “se rifen de tribunal en tribunal y tán presos de la politización”. Poro, reivindicaron responsabilidá a los partíos políticos pa promover una reforma del Estatutu que recueya la oficialidá.

Del mesmu mou, hubo crítiques pal Gobiernu de coalición, con una política llingüística que calificaron de mui mala, “y esa valoración afeuta a tolos componentes d’esi Gobiernu, nun se pue ún llabar les manes porque nun se tenga esa cartera en concreto”. Tamién se-y recordó a la Directora Xeneral de Política Llingüística, Consuelo Vega, que la reivindicación de la oficialidá si ye mayoritaria, “más bien paez que quier que seya minoritaria, que pa eso ta nesi puestu, y si lo ye, pa negalo”.

“La reivindicación va siguir siempre viva y sollerte, porque tenemos la razón, les ganes, l’amor pola llingua nes cabeces y nos corazones. Vamos siguir lluchando, vamos siguir falando, vamos siguir reclamando lo que ye nueso. Vamos siguir pidiendo la oficialidá”, señalaron pa finar.